8 قىركۇيەككە قاراعان ءتۇنى رەسەي اسكەرى كيەۆكە دروندار مەن بالليستيكالىق زىمىراندار ارقىلى سوققى جاسادى، دەپ حابارلايدى "ادىرنا" ءتىلشىسى.
ۋكراينا بيلىگىنىڭ مالىمەتىنشە، شابۋىل سالدارىنان ەكى ادام قازا تاۋىپ، تاعى 10 ادام جاراقات العان. زارداپ شەككەندەردىڭ بەسەۋى اۋرۋحاناعا جەتكىزىلسە، ەكەۋىنىڭ جاعدايى اۋىر.
ۋكراينانىڭ توتەنشە جاعدايلار جونىندەگى مەملەكەتتىك قىزمەتى كيەۆتىڭ كەمىندە بەس اۋدانىندا عيماراتتاردىڭ قيراپ، ءورت شىققانىن حابارلادى.
سولومەن اۋدانىندا بەس قاباتتى تۇرعىن ۇيگە زىمىران سىنىقتارى قۇلاپ، عيمارات ىشىندە ادامدار قامالىپ قالعان. قۇتقارۋشىلار 10 ادامدى ەۆاكۋاتسيالاعان. گولوسەەۆ اۋدانىندا 26 قاباتتى عيماراتتىڭ جوعارعى قاباتتارىنىڭ ءبىرى زاقىمدانعان. سونداي-اق وقۋ ورنىنىڭ اۋماعىندا ءورت شىققان
كيەۆ وبلىسىندا دا شابۋىل سالدارىنان نىساندار زاقىمدانعان. اقپاراتقا سايكەس، بروۆارى، بوريسپول، فاستوۆ جانە وبۋحوۆ اۋداندارىندا تۇرعىن ۇيلەر، كاسىپورىندار، قويمالار مەن كولىكتەر بۇلىنگەن. بەلايا تسەركوۆ قالاسىندا ءبىر ەر ادام سىنىقتاردان جارالانعان.
شابۋىل اقش پرەزيدەنتىنىڭ ارنايى وكىلدەرى ستيۆ ۋيتكوفف پەن دجارەد كۋشنەردىڭ كيەۆتەن كەتۋىنەن كەيىن بولدى. بۇعان دەيىن ۋكراينا پرەزيدەنتى ۆلاديمير زەلەنسكي ۇشجاقتى «ۋكراينا–اقش–رەسەي» فورماتىنداعى كەلىسسوزدەرگە دايىن ەكەنىن ايتقان. رەسەي تاراپى دا مۇنداي كەلىسسوزدەردى قايتا باستاۋ مۇمكىندىگىن جوققا شىعارمايتىنىن ايتقان.
