قازاقستانداعى التى بانك 2025 جىلى اتقارۋشى ورگان مۇشەلەرىنە 1 ملرد تەڭگەدەن استام سىياقى تولەگەن، دەپ حابارلايدى "ادىرنا" ءتىلشىسى Finprom.kz-كە سىلتەپ.
ەڭ كوپ سىياقىنى Halyk Bank تولەگەن. بانكتىڭ اتقارۋشى ورگان مۇشەلەرىنە بەرگەن جالپى سىياقىسى 4,47 ملرد تەڭگەنى قۇرادى. 2024 جىلى بۇل كورسەتكىش 4,06 ملرد تەڭگە بولعان.
ەكىنشى ورىندا Bank RBK – 3,85 ملرد تەڭگە. ءبىر جىل بۇرىن بانك باسشىلىعىنا 3,3 ملرد تەڭگە تولەنگەن. ءۇشىنشى ورىنعا ForteBank جايعاستى. ونىڭ 2025 جىلعى سىياقى قورى 1,86 ملرد تەڭگە بولدى. بۇل 2024 جىلعى 3,97 ملرد تەڭگەمەن سالىستىرعاندا ايتارلىقتاي از.
ۇزدىك التىلىققا سونداي-اق ەۋرازيالىق بانك (1,69 ملرد تەڭگە), Home Credit Bank (1,32 ملرد تەڭگە) جانە Altyn Bank (1,28 ملرد تەڭگە) كىردى. بۇل سومالار ءار باسشىنىڭ جەكە تابىسىن كورسەتپەيدى. سەبەبى بانكتەردەگى اتقارۋشى ورگان مۇشەلەرىنىڭ سانى ءارتۇرلى، ال ءبىر بانكتىڭ وزىندە باسشىلاردىڭ سىياقىسى كولەمى بويىنشا ايىرماشىلىق بولۋى مۇمكىن.
Finprom.kz ەسەپتەۋىنشە، ءبىر اتقارۋشى ورگان مۇشەسىنە شاققانداعى ورتاشا سىياقى كولەمى Bank RBK-دە ەڭ جوعارى بولعان. مۇندا ءبىر باسشىعا ورتا ەسەپپەن 770,1 ملن تەڭگەدەن كەلگەن. بۇل ايىنا شامامەن 64 ملن تەڭگەگە تەڭ.
Halyk Bank-تە ءبىر باسشىعا شاققانداعى ورتاشا كورسەتكىش 446,5 ملن تەڭگە بولدى. بانكتىڭ اتقارۋشى ورگانىندا 10 ادام بار.
Home Credit Bank-تە بۇل كورسەتكىش 329,5 ملن، ەۋرازيالىق بانكتە – 241,3 ملن، Altyn Bank-تە – 212,7 ملن، ForteBank-تە 154,7 ملن تەڭگەنى قۇرادى.
بانك تسەنتركرەديتتە ءبىر باسشىعا ورتا ەسەپپەن 243,1 ملن تەڭگە، KMF-تە – 208,3 ملن، Bereke Bank-تە – 153,9 ملن، Alatau City Bank-تە 124,1 ملن تەڭگەدەن كەلگەن.
ال ەڭ تومەنگى ورتاشا كورسەتكىشتەر ICBC-دە – 21,6 ملن تەڭگە، Bank of China-دا – 25,1 ملن تەڭگە جانە KZI Bank-تە – 31,8 ملن تەڭگە بولدى.
جالپى، 2025 جىلى اتقارۋشى ورگان مۇشەلەرىنە تولەنگەن سىياقى كولەمى بانكتەردىڭ باسىم بولىگىندە وسكەن. تولەم كولەمى ءتورت قارجى ۇيىمىندا ازايعان. ولاردىڭ ىشىندە ەڭ ەلەۋلى تومەندەۋ ForteBank-تە بايقالدى: 3,97 ملرد تەڭگەدەن 1,86 ملرد تەڭگەگە دەيىن.
2026 جىلعى شىلدەدەگى جاعداي بويىنشا قازاقستاندا 23 ەكىنشى دەڭگەيلى بانك جۇمىس ىستەگەن. ونىڭ 10-ى شەتەلدىك بانكتەردىڭ ەنشىلەس ۇيىمى. ەلدە 283 بانك فيليالى جانە بەيرەزيدەنت بانكتەردىڭ 19 وكىلدىگى بولعان.
