قازاقستان ايەلدەر قۇراماسىنىڭ كوشباسشىسى ەلەنا رىباكينا مانسابىندا العاش رەت ايەلدەر تەننيسى قاۋىمداستىعىنىڭ (WTA) الەمدىك رەيتينگىندە ءبىرىنشى ورىنعا كوتەرىلدى. بۇل تۋرالى قتف جازدى، دەپ حابارلايدى «ادىرنا» ءتىلشىسى.
بۇل قازاقستاندىق تەننيسشىنىڭ US Open-2026 ءتۋرنيرىنىڭ جارتىلاي فينالىنا شىعۋىنىڭ ارقاسىندا مۇمكىن بولدى. WTA-نىڭ live-رەيتينگىندە رىباكينا بەلارۋس وكىلى ارينا سوبولەنكودان وزىپ، جاڭا كوشباسشى اتاندى. رەيتينگتىڭ رەسمي جاڭارتىلعان نۇسقاسى دۇيسەنبى، 14 قىركۇيەكتە جاريالانادى.
مەملەكەت باسشىسى قاسىم-جومارت توقاەۆ سپورتشىنى قۇتتىقتاپ، جاڭا بەلەستەرگە باتىل قادام باسا بەرۋىنە تىلەكتەستىك ءبىلدىردى.
ء«سىز ايرىقشا تالانت پەن تىنىمسىز ەڭبەكتىڭ جانە وزىڭىزگە دەگەن نىق سەنىمنىڭ ارقاسىندا WTA رەيتينگىندە كوش باستاپ، بيىك شىڭدى باعىندىردىڭىز. وسىناۋ تاريحي جەڭىسىڭىز قازاق سپورتىنىڭ داڭقىن اسىردى. ەسىمىڭىز الەمدىك تەننيس جىلناماسىنان ويىپ تۇرىپ ورىن الدى. ءسىزدىڭ جەتىستىككە تولى جولىڭىز – ەلىمىزدىڭ جاس سپورتشىلارى مەن دۇنيەنىڭ تۇكپىر-تۇكپىرىندەگى ميلليونداعان تەننيس جانكۇيەرى ءۇشىن ۇلگى-ونەگە. سونىمەن قاتار كورتتا دا، قوعامدىق ورىنداردا دا، جۇرتشىلىقپەن قارىم-قاتىناس بارىسىندا دا بايقالاتىن جوعارى مادەنيەتىڭىزدى ايرىقشا اتاپ وتكىم كەلەدى. بۇل – ءسوزسىز ءسىزدىڭ پاراساتىڭىز بەن ادامي قالپىڭىزدىڭ ايقىن كورىنىسى»، – دەپ جازىلعان قۇتتىقتاۋدا.
ايتا كەتەيىك، ەلەنا رىباكينا جەكەلەي سىندا الەمدىك رەيتينگتى باسقارعان قازاقستاننىڭ تۇڭعىش وكىلى اتاندى. بۇعان دەيىن ەلىمىزدىڭ بىردە-ءبىر سپورتشىسى ايەلدەر اراسىندا دا، ەرلەر اراسىندا دا – جەكەلەي سىندا الەمدىك رەيتينگتىڭ ءبىرىنشى ساتىسىنا كوتەرىلمەگەن.
