قازاقستاندىق ءپاراجۇزۋشى ءالي تۇرعانبەكوۆ 2026 جىلعى ازيا پارا ويىندارىندا كۇمىس مەدال جەڭىپ الدى. وتانداسىمىز SB4 ساناتىندا 100 مەترگە براسس ادىسىمەن جۇزۋدەن وتكەن فينالدىق جارىستا 1 مينۋت 44,26 سەكۋند ناتيجەسىن كورسەتتى. وسىلايشا، ول جارىستى ەكىنشى ورىنمەن اياقتادى، دەپ حابارلايدى "ادىرنا".
التىن مەدال مالايزيا وكىلىنە بۇيىردى. ول قاشىقتىقتى 1 مينۋت 41,44 سەكۋندتا ءجۇزىپ ءوتىپ، ازيا پارا ويىندارىنىڭ جاڭا رەكوردىن ورناتتى.
ايتا كەتەيىك، ءالي تۇرعانبەكوۆ ىرىكتەۋ كەزەڭىندە ۇزدىك ناتيجە كورسەتىپ، جارىس رەكوردىن جاڭارتقان ەدى. الايدا فينالدا قارسىلاسىنا جول بەرىپ، كۇمىس جۇلدەنى قاناعات تۇتتى.
ءالي تۇرعانبەكوۆ — قازاقستاننىڭ تانىمال پاراسپورتشىلارىنىڭ ءبىرى. ول تالدىقورعان قالاسىندا دۇنيەگە كەلگەن. تۋا بىتكەن ەرەكشەلىگىنە قاراماستان، بالا كەزىنەن سپورتقا قىزىعۋشىلىق تانىتىپ، ءجۇزۋ ارقىلى ۇلكەن جەتىستىكتەرگە جەتۋدى ماقسات ەتكەن.
بالاسىنىڭ دامۋىنا قولايلى جاعداي جاساۋ ءۇشىن وتباسى ەلورداعا كوشكەن. كەيىن ءالي پاراجۇزۋمەن جۇيەلى تۇردە اينالىسىپ، تاباندى جاتتىعۋلاردىڭ ناتيجەسىندە قازاقستان ۇلتتىق قۇراماسىنىڭ قاتارىنا قوسىلدى.
سپورتشىنىڭ جەتىستىكتەرى اراسىندا قازاقستان مەن ازيا دەڭگەيىندەگى جاسوسپىرىمدەر جارىستارىندا جەڭىپ العان وننان استام التىن مەدال بار. ول حالىقارالىق جارىستاردا دا ەل نامىسىن ابىرويمەن قورعاپ كەلەدى.
ءالي تۇرعانبەكوۆتىڭ ءومىر جولى سپورتتىق جەتىستىكتەرىمەن عانا ەمەس، الەمگە ايگىلى تۇلعالارمەن كەزدەسۋلەرىمەن دە كوپشىلىككە تانىمال. بالا كەزىنەن فۋتبولعا اۋەس بولعان ول الەمدىك فۋتبول جۇلدىزدارىمەن جۇزدەسۋدى ارمانداعان.
قايسارلىعى مەن جاقىندارىنىڭ قولداۋىنىڭ ارقاسىندا ءالي ديەگو مارادونا، ليونەل مەسسي، كريشتيانۋ رونالدۋ، نەيمار، موحاممەد سالاح، لۋكا مودريچ جانە اندرەي شەۆچەنكو سىندى فۋتبول اڭىزدارىمەن كەزدەسكەن. ولاردىڭ كەيبىرىمەن بىرگە فۋتبول ويناۋدىڭ دا ءساتى تۇسكەن.
2019 جىلى قازاقستاندىق ءجاسوسپىرىم ۋەفا سۋپەركۋبوگىن «ليۆەرپۋل» كومانداسىنىڭ كاپيتانىنا تابىستاۋ قۇرمەتىنە يە بولدى. سونىمەن قاتار ول ايگىلى مما سپورتشىسى حابيب نۋرماگومەدوۆپەن جانە موتيۆاتسيالىق سپيكەر نيك ۆۋيچيچپەن جۇزدەسكەن.
ءالي تۇرعانبەكوۆتىڭ كەزەكتى حالىقارالىق جەتىستىگى قازاقستاندىق پاراسپورتتىڭ دامۋىنا قوسىلعان ۇلەس بولىپ، جاس سپورتشىلارعا جىگەر بەرەرى ءسوزسىز.
