قازاقستاندىق Tour Invest كومپانياسى اقش-تىڭ سانكتسيالىق تىزىمىنە ەنگىزىلدى. بۇل تۋرالى ەلدىڭ قارجى مينيسترلىگى ايتتى، دەپ حابارلايدى «ادىرنا» ءتىلشىسى.
اقش-تىڭ شەتەلدىك اكتيۆتەردى باقىلاۋ باسقارماسى تاراتقان مالىمەتكە سايكەس، سانكتسيا سالۋعا كومپانيانىڭ يراننىڭ Mahan Air اۋە كومپانياسىنىڭ باس ساتۋ اگەنتى رەتىندە قىزمەت اتقارۋى سەبەپ بولعان. ۆەدومستۆو Tour Invest پەن يران اراسىنداعى ىقتيمال بايلانىستاردى سانكتسيا ەنگىزۋگە نەگىز رەتىندە كورسەتكەن.
اقش تاراپىنىڭ مالىمەتىنشە، Mahan Air اۋە كومپانياسى اقش پەن ەۋرووداقتىڭ قولدانىستاعى شەكتەۋلەرىنە قاراماستان، تاياۋ شىعىس باعىتىندا رەيستەرىن جالعاستىرىپ، قىتايعا جۇك جانە جولاۋشى تاسىمالداۋدى جۇزەگە اسىرعان.
يراندىق اۋە كومپانياسى الماتىعا دا رەيستەر ورىندايدى. اقش ۆەدومستۆوسىنىڭ دەرەگىنە سايكەس، Tour Invest كومپانياسى Mahan Air-ءدىڭ جەرگىلىكتى ساتۋ اگەنتى قىزمەتىن اتقارعان.
ء«بىز يران رەجيمىنە قارجىلىق قولداۋ كورسەتەتىندەر قاتاڭ سالدارعا دۋشار بولاتىنىن ەسكەرتكەن ەدىك. بۇگىن سول ۋادەمىزدى ورىنداپ، Mahan Air قىزمەتىن قولداۋدى جالعاستىرعان كومپانيالارعا سانكتسيا سالدىق. بۇل يراننىڭ قالعان اۋە كومپانيالارىمەن بيزنەس جۇرگىزەتىندەردىڭ بارلىعىنا ەسكەرتۋ بولسىن. ولاردىڭ ءبارى سانكتسياعا ىلىكتى. مۇنداي ارەكەتتەر جاھاندىق قارجى جۇيەسىنەن شەتتەتىلۋ قاۋپىن ارتتىرادى»، – دەدى اقش قارجى ءمينيسترى سكوتت بەسسەنت.
ايتا كەتەيىك، Secondary sanctions risk بەلگىسى ەكىنشى دەڭگەيلى سانكتسيالاردىڭ قولدانىلۋ قاۋپى بار ەكەنىن كورسەتەدى. الايدا بۇل كومپانياعا بارلىق شەكتەۋ اۆتوماتتى تۇردە ەنگىزىلدى دەگەندى بىلدىرمەيدى. قازىرگى ۋاقىتتا كومپانيا اقش-تىڭ سانكتسيالىق تىزىمىنە ەنگىزىلگەن، ال الداعى ىقتيمال شارالار ونىڭ قىزمەتىنىڭ سيپاتى مەن جۇرگىزگەن وپەراتسيالارىنا بايلانىستى بولماق.
Tour Invest – الماتىدا تىركەلگەن قازاقستاندىق كومپانيا. ول 2014 جىلدان بەرى تۋريستىك وپەراتور قىزمەتىمەن اينالىسادى. كومپانيانىڭ باسشىسى رەتىندە باباك الي زياي ەسىمى كورسەتىلگەن.
