فوتو: Report
قازاقستاننىڭ اسكەري-تەڭىز كۇشتەرى كاسپي تەڭىزىندە جوسپارلى وقۋ-جاتتىعۋ جۇمىستارىن باستادى. بۇل تۋرالى قر قورعانىس مينيسترلىگى مالىمدەدى، دەپ حابارلايدى "ادىرنا".
«كاسپي تەڭىزىنىڭ قازاقستان سەكتورىندا قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرى جوسپارلى وقۋ-جاتتىعۋىن باستادى. ەكيپاجدار قازاقستان سەكتورىنداعى تەڭىز ايدىنىن تولىق ءجۇرىپ ءوتىپ، ءتۇرلى جاعدايلاردا ارەكەت ەتۋ داعدىلارىن پىسىقتايدى جانە پراكتيكالىق اتىس جاتتىعۋلارىن وتكىزەدى»، – دەلىنگەن ۆەدومستۆو حابارلاماسىندا.
وقۋ-جاتتىعۋ ءۇش كەزەڭنەن تۇرادى. اسكەري تەڭىزشىلەر كەمەلەر اراسىنداعى ءوزارا ءىس-قيمىلدى، ناۆيگاتسيا مەن بايلانىستى، كەمەنى باسقارۋدى جانە قارۋ-جاراقتى قولدانۋدى پىسىقتايدى. سونداي-اق ەكيپاجداردىڭ جاعالاۋدان ەداۋىر قاشىقتىقتاعى ارەكەتتەرىنە ەرەكشە نازار اۋدارىلادى.
اسكەري-تەڭىز كۇشتەرى باس قولباسشىسىنىڭ جاۋىنگەرلىك دايارلىق جونىندەگى ورىنباسارى، 1-رانگ كاپيتانى ارمان ساتقانوۆتىڭ ايتۋىنشا، وقۋ-جاتتىعۋ بارىسىندا ەكيپاجداردىڭ پراكتيكالىق داعدىلارىن ودان ءارى جەتىلدىرۋگە باسىمدىق بەرىلەدى.
«جورىق-جاتتىعۋ بارىسىندا ەكيپاجدار كەمەدەگى قارۋ-جاراقتى قولدانا وتىرىپ، پراكتيكالىق اتىس جۇرگىزەدى جانە بىرلەسكەن ءىس-قيمىلداردى پىسىقتايدى. كەزەڭدەر وتكەن سايىن تاپسىرمالار كۇردەلەنە تۇسەدى، سونداي-اق وقۋ-جاتتىعۋعا قوسىمشا بولىمشەلەر تارتىلادى. بۇل وقۋ-جاتتىعۋ كەمە ەكيپاجدارىنىڭ ءتۇرلى جاعدايلاردا قويىلعان مىندەتتەردى ورىنداۋعا دايىندىعىن تەكسەرۋگە جانە اسكەري-تەڭىز كۇشتەرىنىڭ جاۋىنگەرلىك دايارلىعىن ودان ءارى جەتىلدىرۋگە مۇمكىندىك بەرەدى»، – دەپ اتاپ ءوتتى قورعانىس مينيسترلىگى.
