قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ 21 جاستاعى ۇلى تاۋمان سارسەمباەۆتار اۋلەتىمەن قۇدا بولعالى وتىر، دەپ حابارلايدى "ادىرەا" ءتىلشىسى ۇلىسمەدياعا سىلتەپ.
باسىلىمنىڭ مالىمەتىنشە، تاۋمان نازارباەۆتىڭ قالىڭدىعى — يندۋستريا جانە ينفراقۇرىلىمدىق دامۋ ءمينيسترىنىڭ بۇرىنعى ورىنباسارى ادىلبەك سارسەمباەۆتىڭ قىزى ايدانا سارسەمباەۆا. ول 2004 جىلعى 24 جەلتوقساندا دۇنيەگە كەلگەن.
ادىلبەك سارسەمباەۆ 48 جاستا، استانادا تۋعان. ماماندىعى بويىنشا زاڭگەر، ساياسي عىلىمدار كانديداتى. ول مەملەكەتتىك قىزمەتتە، استانا قالاسى اكىمدىگىندە، پرەزيدەنت اكىمشىلىگىندە جانە «قازاقستان ينجينيرينگ» ۇلتتىق كومپانياسىندا قىزمەت اتقارعان.
سارسەمباەۆ 2020 جىلى «قازاقستان ينجينيرينگ» كومپانياسىنىڭ باسقارما توراعاسى بولىپ تاعايىندالدى. 2021 جىلى يندۋستريا جانە ينفراقۇرىلىمدىق دامۋ ۆيتسە-ءمينيسترى قىزمەتىنە كەلىپ، 2022 جىلعى تامىزعا دەيىن وسى لاۋازىمدا جۇمىس ىستەدى.
باسىلىم مالىمەتىنشە، تاۋمان مەن ايدانانىڭ ۇيلەنۋ تويىن استاناداعى The Ritz-Carlton قوناقۇيىندە وتكىزۋ جوسپارلانعان.
سونىمەن قاتار ادىلبەك سارسەمباەۆتىڭ ەسىمى بۇعان دەيىن بىرقاتار قىلمىستىق ىستەرگە قاتىستى اتالعان. 2025 جىلدىڭ سوڭىندا وعان قاتىستى سوتالدى تەرگەۋ باستالعانى حابارلاندى. الايدا ناقتى قانداي باپ بويىنشا تەرگەۋ جۇرگىزىلىپ جاتقانى جاريالانباعان.
بۇعان دەيىن سارسەمباەۆتىڭ اتى قورعانىس سالاسىنا قاتىستى 607,7 ميلليون تەڭگەنىڭ ۇرلانۋى جونىندەگى قىلمىستىق ءىس بويىنشا سوت ماتەريالدارىندا اتالعان. سوت ونى قاراجاتتى جىمقىرۋ ىسىنە قاتىسۋشى دەپ تانىماعان.
