ۋكراينا باسشىسى ۆلاديمير زەلەنسكي بۇرىنعى ءباسپاسوز حاتشىسى يۋليا مەندەلگە قارسى سانكتسيا ەنگىزدى، دەپ حابارلايدى «ادىرنا» ءتىلشىسى.
پرەزيدەنت سايتىندا جاريالانعان جارلىقتا ونىڭ ۋكراينا تۋرالى جالعان اقپارات تاراتقانى ايتىلعان.
«جالعان اقپارات پەن رەسەيلىك ناسيحاتتى تاراتاتىن، سونداي-اق رەسەيدىڭ ۋكرايناعا قارسى اگرەسسيۆتى ساياساتىن قولدايتىن 10 ازاماتقا شەكتەۋ شارالارى قولدانىلدى. اتاپ ايتقاندا، سانكتسيالار يۋليا مەندەلگە قاتىستى ەنگىزىلدى»، – دەلىنگەن حابارلامادا.
مەندەلدىڭ ءوزى بۇل جاعدايعا ح الەۋمەتتىك جەلىسىندەگى پاراقشاسىندا پىكىر ءبىلدىردى. ونىڭ ايتۋىنشا، سانكتسيالار ەۋروپارلامەنتتەگى ءسوز سويلەۋىنەن بىرنەشە كۇن بۇرىن ەنگىزىلگەن.
«ۋكراينا ازاماتتارىنا قارسى سانكتسيالار ەنگىزۋ كونستيتۋتسياعا قايشى كەلەدى، ءدال سول سياقتى زەلەنسكيدىڭ كوپتەگەن باسقا شەشىمى دە زاڭعا سايكەس ەمەس. ۆلاديمير زەلەنسكي ولاردى ۋكرايناداعى بەيبىتشىلىكتى قولدايتىن كەز كەلگەن ادامعا قارسى پايدالانىپ وتىر. مەن تاكەر كارلسونعا بەرگەن سۇحباتىمنان كەيىن ماعان “مەملەكەتكە وپاسىزدىق جاسادى” دەگەن ايىپ تاعىلۋى مۇمكىن ەكەنىن بىلگەنمىن جانە سانكتسيا ەنگىزىلۋى ىقتيمال ەكەنىن دە بولجادىم.
بۇل مەنىڭ ۇستانىمىمدى دا، ميلليونداعان ۋكراينالىقتىڭ كوزقاراسىن دا وزگەرتپەيدى. ۋكرايناعا امان قالۋ ءۇشىن تاعى ءبىر اۆتوكراتيا ەمەس، بەيبىتشىلىك قاجەت»، – دەپ جازدى مەندەل.
