ۇلىتاۋ وبلىسىندا «تازا قازاقستان» رەسپۋبليكالىق ەكولوگيالىق اكتسياسى اياسىندا اۋقىمدى كوگالداندىرۋ جانە سانيتارلىق تازالىق جۇمىستارى جۇرگىزىلدى. ءوڭىردىڭ ەلدى مەكەندەرىن اباتتاندىرۋعا باعىتتالعان شاراعا وبلىس بويىنشا 10 مىڭعا جۋىق ادام قاتىسىپ، 150 ارنايى تەحنيكا جۇمىلدىرىلدى.
ەكولوگيالىق اكتسياعا ۇلىتاۋ وبلىسىنىڭ اكىمى ەسەت بايكەن دە قاتىسىپ، تۇرعىندارمەن بىرگە اعاش كوشەتتەرىن وتىرعىزدى. ءوڭىر باسشىسى كوگالداندىرۋ جۇمىستارىنىڭ ماڭىزدىلىعىنا توقتالىپ، وتىرعىزىلعان ءاربىر اعاشتىڭ جەرسىنۋىنە جانە كەيىنگى كۇتىمىنە ەرەكشە ءمان بەرۋ قاجەتتىگىن اتاپ ءوتتى.
سونداي-اق اعاش وتىرعىزۋمەن عانا شەكتەلمەي، جاسىل جەلەكتەردى تۇراقتى سۋارۋ، كۇتىپ-باپتاۋ جانە ساقتاۋ جۇمىستارىن جۇيەلى تۇردە ۇيىمداستىرۋ كەرەكتىگىن جەتكىزدى.
اكتسياعا مەملەكەتتىك مەكەمەلەردىڭ قىزمەتكەرلەرى، كاسىپورىن ۇجىمدارى، ەرىكتىلەر، جاستار جانە ءوڭىر تۇرعىندارى بەلسەندى قاتىستى. بىرلەسكەن جۇمىستىڭ ناتيجەسىندە وبلىس اۋماعىندا 3500 اعاش كوشەتى وتىرعىزىلدى.
كوگالداندىرۋمەن قاتار، ەلدى مەكەندەردەگى قوعامدىق ورىنداردا، كوشەلەر مەن اۋلالاردا سانيتارلىق تازالىق جۇمىستارى جۇرگىزىلدى. ارنايى تەحنيكالاردىڭ كومەگىمەن جينالعان قوقىستار شىعارىلىپ، اۋماقتاردى اباتتاندىرۋ شارالارى جۇزەگە اسىرىلدى.
اۋقىمدى ەكولوگيالىق باستاما ءوڭىر تۇرعىندارىن ورتاق ىسكە جۇمىلدىرىپ، قورشاعان ورتانى قورعاۋ مادەنيەتىن قالىپتاستىرۋعا باعىتتالدى. ءارتۇرلى بۋىن وكىلدەرىنىڭ بىرلەسىپ ەڭبەك ەتۋى تۋعان ولكەنىڭ تازالىعى مەن كوركەيۋىنە ءاربىر ازاماتتىڭ ۇلەس قوسا الاتىنىن كورسەتتى.
«تازا قازاقستان» اكتسياسى ۇلىتاۋ وبلىسىندا الداعى ۋاقىتتا دا جالعاسادى. وڭىردە جاسىل ايماقتاردى كوبەيتۋ، ەلدى مەكەندەردى اباتتاندىرۋ جانە تۇرعىندار ءۇشىن قولايلى ءارى تازا ورتا قالىپتاستىرۋ باعىتىنداعى جۇمىستار جۇيەلى تۇردە جۇرگىزىلەتىن بولادى.
