فوتو: Sfera
قازاقستان 2026 جىلى رەسەيدەن تابيعي گاز ساتىپ الۋ كولەمىن شامامەن ءۇش ەسەگە ارتتىرۋى مۇمكىن. بولجام بويىنشا، بيىل رەسەيدەن قازاقستانعا جەتكىزىلەتىن گاز كولەمى 11 ملرد تەكشە مەترگە جۋىقتايدى. كورسەتكىش 2025 جىلى شامامەن 4 ملرد تەكشە مەتر بولعان. بۇل تۋرالى OilPrice.com رەسەيلىك تاسس اگەنتتىگىنىڭ دەرەكتەرى مەن قر ەنەرگەتيكا ۆيتسە-ءمينيسترى قايىرحان تۇتقىشباەۆتىڭ مالىمدەمەسىنە سىلتەمە جاساپ حابارلادى، دەپ جازادى “ادىرنا”.
OilPrice.com مالىمەتىنشە، قازاقستان مەن رەسەيلىك «گازپروم» كومپانياسى بيىل گاز جەتكىزۋگە قاتىستى قوسىمشا كەلىسىمگە قول قويعان. سونىمەن قاتار تاراپتار 2027 جىلى قازاقستانعا شامامەن 9 ملرد تەكشە مەتر رەسەيلىك گاز جەتكىزۋ ماسەلەسىن تالقىلاپ جاتىر.
قازاقستان سوڭعى جىلدارى تابيعي گازدىڭ تازا ەكسپورتتاۋشىسى بولىپ كەلدى. 2025 جىلى ەلدەگى گاز ءوندىرۋ كولەمى رەكوردتىق 68,1 ملرد تەكشە مەترگە جەتكەن.
الايدا ىشكى تۇتىنۋدىڭ ءوسۋى گاز يمپورتىن ارتتىرۋ قاجەتتىلىگىن تۋىنداتىپ وتىر. رەسەيدەن كەلەتىن گاز ەلدىڭ ىشكى نارىعىنداعى ءوسىپ كەلە جاتقان سۇرانىستى قامتاماسىز ەتۋگە باعىتتالماق.
OilPrice.com كەلىسىمنىڭ قارجىلىق شارتتارى جاريالانباعانىن اتاپ ءوتتى. باسىلىم رەسەيلىك گازدىڭ قازاقستانعا سالىستىرمالى تۇردە تومەن باعامەن جەتكىزىلۋى مۇمكىن ەكەنىن جازادى. بۇعان رەسەيدىڭ ەۋروپا نارىعىنا گاز ەكسپورتىن قىسقارتقاننان كەيىن جاڭا وتكىزۋ نارىقتارىن ىزدەۋى سەبەپ بولۋى مۇمكىن.
رەسەيدەن گاز ساتىپ الۋ كولەمىنىڭ ۇلعايۋى قازاقستان ءۇشىن ەكونوميكالىق قاجەتتىلىكپەن قاتار، سىرتقى ساۋداعا قاتىستى جاڭا تاۋەكەلدەر دە تۋىنداتۋى مۇمكىن.
OilPrice.com رەسەيدىڭ ەنەرگەتيكالىق رەسۋرستارىن ساتىپ الاتىن ەلدەرگە قاتىستى اقش-تىڭ ىقتيمال سانكتسيالىق جانە تاريفتىك شارالارىن اتاپ ءوتتى. باسىلىم بۇل فاكتور ورتالىق ازيا ەلدەرىنىڭ ەنەرگەتيكالىق ساۋداسىنا اسەر ەتۋى مۇمكىن ەكەنىن جازادى.
وسىلايشا، رەسەيدەن گاز يمپورتىن ارتتىرۋ قازاقستاننىڭ ىشكى نارىعىن تۇراقتى وتىنمەن قامتاماسىز ەتۋگە مۇمكىندىك بەرسە، ەكىنشى جاعىنان، ەلدىڭ ەنەرگەتيكالىق ساۋداسىنا قاتىستى گەوساياسي جانە سانكتسيالىق تاۋەكەلدەردى كۇشەيتۋى ىقتيمال.
