Saudi Aramco كومپانياسى ساۋد ارابياسىنداعى «شىعىس — باتىس» مۇناي قۇبىرىنا جاسالعان درون شابۋىلىنا بايلانىستى كەم دەگەندە ەۋروپاداعى ەكى مۇناي وڭدەۋ زاۋىتىنا قازان ايىندا ۇزاقمەرزىمدى كەلىسىمشارتتار اياسىندا شيكى مۇناي جەتكىزە المايتىنىن ەسكەرتتى. بۇل تۋرالى Bloomberg اگەنتتىگى جازدى، دەپ حابارلايدى «ادىرنا» ءتىلشىسى.
كۇزدىڭ ورتاسىندا ساۋد ارابياسى مۇنايىنىڭ جەتكىزىلمەۋى ەۋروپالىق تۇتىنۋشىلاردى بالاما شيكىزات كوزدەرىن ىزدەۋگە ءماجبۇر ەتۋى مۇمكىن. پولشاداعى Orlen SA كومپانياسى جەتكىزۋشىلەر نارىعىن تالداۋعا كىرىسكەن. بۇل وڭىرلىك مۇناي سۇرىپتارىنىڭ قىمباتتاۋىنا اسەر ەتكەن. ماسەلەن، Dated Brent ەتالوندىق مۇنايىنىڭ باعاسى ءبىر مەزەتتە باررەلىنە 130 دوللاردان اسقان.
اگەنتتىك دەرەككوزىنە سايكەس، Saudi Aramco 16 قىركۇيەكتە زاقىمدانعان «شىعىس — باتىس» مۇناي قۇبىرىنىڭ جۇمىسىن ءىشىنارا قالپىنا كەلتىرۋ جۇمىستارىن باستاپ كەتكەن. ماماندار بىرنەشە كۇن ىشىندە قۇبىردىڭ وتكىزۋ قابىلەتىنىڭ جارتىسى قالپىنا كەلەدى دەپ كۇتۋدە. ال ينفراقۇرىلىم تولىق قۋاتىندا شامامەن التى اپتادان كەيىن جۇمىس ىستەي باستايدى.
درون شابۋىلىنىڭ سالدارىن ازايتۋ ءۇشىن Saudi Aramco ازيا ەلدەرىندەگى كليەنتتەرىنە جەدەل جەتكىزىلەتىن مۇناي پارتيالارىن سپوت باعاسىمەن ۇسىنۋعا ءماجبۇر بولعان. ترەيدەرلەر قۇبىر جۇمىسى قالپىنا كەلگەننەن كەيىن ەۋروپالىق كاسىپورىندارعا دا وسىنداي شارتتاردىڭ ۇسىنىلاتىنىن باقىلاماق.
الايدا جەتكىزىلىمدەردى ازيا باعىتىنا قايتا باعدارلاۋ ورمۇز بۇعازى ارقىلى ەنەرگيا رەسۋرستارىن تاسىمالداۋعا بايلانىستى قيىندىقتار تۋىنداتۋى مۇمكىن. ساۋد ارابياسى تاياۋ شىعىستاعى قاقتىعىس كەزەڭىندە مۇنداي تاۋەكەلدەردەن بارىنشا اۋلاق بولۋعا تىرىسقان.
ەۋروپاداعى مۇناي وڭدەۋ زاۋىتتارى، ءوز كەزەگىندە، ساۋد ارابياسىنىڭ مۇنايىن ءداستۇرلى تۇردە ەگيپەتتەگى جەرورتا تەڭىزى جاعالاۋىندا ورنالاسقان سيدي-كەرير پورتى ارقىلى الادى.
Bloomberg مالىمەتىنشە، ەۋروپاعا مۇنايدى پارسى شىعاناعى ارقىلى جەتكىزۋ ءۇشىن تانكەرلەر قىزىل تەڭىز باعىتىن پايدالانۋعا ءماجبۇر بولادى. بۇل جاعدايدا حۋسيتتەر شابۋىلىنىڭ قاۋپى ساقتالادى. ال افريكانى اينالىپ وتەتىن بالاما مارشرۋت تاسىمالداۋ مەرزىمىن بەس اپتاعا دەيىن ۇزارتادى.
