قاراعاندى وبلىسىندا كوكتەمگى ەگىس جۇمىستارىنا بولىنگەن 300 ملن تەڭگەنىڭ جىمقىرىلۋ ءىسى بويىنشا تەرگەۋ ءجۇرىپ جاتىر. بۇل تۋرالى 21 قىركۇيەكتە قارجىلىق مونيتورينگ اگەنتتىگى ايتتى، دەپ حابارلايدى «ادىرنا» ءتىلشىسى.
2025 جىلعى مامىردا «اگرارلىق نەسيە كورپوراتسياسى» اق فيليالى مەن «راشان» جشس اراسىندا اينالىم قاراجاتىن تولىقتىرۋ ءۇشىن قارىز بەرۋ تۋرالى شارت جاسالعان. شارت بويىنشا مىندەتتەمەلەردىڭ ورىندالۋىنا «دامۋ» كاسىپكەرلىكتى دامىتۋ قورى» اق كەپىلدىك بەرگەن. شارت تالاپتارىنا سايكەس «راشان» جشس-ءنىڭ شوتىنا 300 ملن تەڭگە قارىز قاراجاتى اۋدارىلعان.
الايدا كەيىن بۇل قاراجات تۇقىم ساتىپ الۋ جانە اۋىل شارۋاشىلىعى تەحنيكاسىن جالعا الۋ شىعىندارى رەتىندە باسقا ەكى كومپانيانىڭ ەسەپشوتتارىنا جىبەرىلگەن. ونىڭ ىشىندە شامامەن 148 ميلليون تەڭگە تۇقىم الۋعا، 152 ميلليون تەڭگە تەحنيكا جالداۋ، جانار-جاعارماي مەن ەڭبەكاقى تولەمدەرىنە باعىتتالعان.
بىراق تەكسەرۋ بارىسىندا تۇقىم ساتىپ الىنباعانى، تەحنيكا جالعا الىنباعانى جانە كورسەتىلگەن جەر تەلىمدەرىنە اۋىل شارۋاشىلىعى داقىلدارى ەگىلمەگەنى انىقتالعان.
«قازىرگى ۋاقىتتا «راشان» جشس ديرەكتورى كۇدىكتى رەتىندە تانىلىپ، سوت سانكتسياسىمەن ونىڭ مۇلكىنە تىيىم سالىندى»،– دەلىنگەن حابارلامادا.
