قازاقتىڭ جىرشىلىق ونەرىنىڭ وكىلى، جىرشى قونىس ءجۇسىپ قايتىس بولدى. بۇل تۋرالى بەرىك ءجۇسىپوۆ جازبا جاريالادى، دەپ حابارلايدى "ادىرنا" ءتىلشىسى.
قارالى حابار تۋرالى اقپارات 24 قىركۇيەك كۇنى تاراعان. اقتوبەلىك اقىن تالعات تىلەۋلەسوۆ تە جازىپ، مارقۇمدى ەسكە الدى.
ول قونىس ءجۇسىپتىڭ جانى جايساڭ، كوڭىلى دارحان، اقكوڭىل ازامات بولعانىن اتاپ ءوتتى. اقىن مارقۇمنىڭ وزىنە ۇنەمى «اعاجان!» دەپ ىقىلاسپەن سويلەيتىنىن ەسكە العان.
نازارلارىڭىزعا بەرىك ءجۇسىپوۆتىڭ ەستەلىگىن ۇسىنامىز.
قاپ-اي، قونىسجان-اي، اينالايىن-اي! ەكى كەشتىڭ اراسىندا مىناۋ قاڭعىعان وقتاي قانداي حابار بولدى ءوزى؟ سۋىعىن-اي كاپىردىڭ، سۋماڭداۋىن-اي سۇمپايىنىڭ. «قونىس جىرشىدان ايرىلىپ قالدىق!» دەپ جازىپتى اقتوبەلىك اقىن قۇرداسىم تالعات تىلەۋلەسوۆ. جالما-جان تەلەفوننىڭ تۇتقاسىنا جارماستىم، «جالعان ءسوز بولعاي دا» دەپ. سول ەكى ورتادا دوسىم باۋىرجان باباجانمەن دە سويلەسىپ ۇلگەردىم. مۇنداي سۇرقيا حابار جالعان بولۋشى ما ەدى، وكىنىشكە قاراي راس ەكەن. ورالداعى ءىنىم باۋىرجان حاليوللا دا ەسىم-سويىن كۇنى ەرتەڭ بولاتىن اۋقىمدى شاراعا شاقىرىلاتىن قۇرمەتتى قوناقتاردىڭ تىزىمىنە ەنگىزىپ قويىپ: «بەكە-اۋ، مىناۋ نە حابار؟»، — دەپ ول وتىر، اڭىرىپ. وزىمەن سوڭعى رەت قاشان سويلەسكەنىم دە ەسىمدە جوق. قاشان سويلەسسەك تە اڭقىلداپ، ادەتتەگى قالپىمەن «اعاجان!» دەپ اعىنان اقتارىلىپ تۇرۋشى ەدى-اۋ، قۇلدىراڭداعان قۇلىنشاقتاي بولىپ. ە، قۇدىرەتى شەكسىز، ۇستەم، ۇلىق، قاھارلى، تولىق حابار الۋشى، تورەشى قۇداي، سەن مەنىڭ جانىما جاقىن بولىپ، قيماسىما اينالىپ كەتكەن جانداردى جاعالاي بەردىڭ-اۋ. ەشتەڭەگە مۇقتاج ەمەس، مارتەبەلى، بيىك، قورعاۋشى ەدىڭ عوي. بۇل قالاي بولدى؟ جانى جايساڭ، كوڭىلى دارحان، ارامدىق اتاۋلىدان ادا قونىس سياقتى اقەدەن بالاعا كەلگەندە جارىلقاۋشى ءال-عاففارلىعىڭنان اينىپ، ءولتىرۋشى ءال-مۋميت كەيپىڭە ەنە سالعانىڭ نە؟ اسىلىق ايتسام عافۋ ەتىپ، كەشىرىم جاساعايسىڭ، ءال-حاليم، ءبىز سەكىلدى جانى كۇيگەن مومىنىڭا. ەندى ءبىزدىڭ الدىمىزدان: «اينالايىن، اعاجان، استاناعا قوش كەلىپسىڭ!» — دەپ اڭقىلداپ، الاۋ جۇرەگىن قولىنا ۇستاپ شىعىپ، ساعىنىشقا تولى كەۋدەسىن توسىپ كىم قارسى الادى؟ ءوزىڭ جايىندا باسقانى ويلاسام دا، قۇداي شەبەردىڭ قۇرىعىنا تىم ەرتە ىلىگىپ، ۋىسىنا تەز تۇسەدى دەپ ەش ويلاماپپىن. كەشىر، سونىڭ جايىن سەزىنە الماعان جامان اعاڭدى، اينالايىن!
