قازاقستاندىق جەڭىل اتلەت ياسمينا توقسانباەۆانىڭ جاپونيادا ءوتىپ جاتقان ازيا ويىندارىنداعى سپورتتىق جۇرىستەن كورسەتكەن جەڭىستى ناتيجەسىنىڭ كۇشى جويىلدى. بۇل تۋرالى سپورتشىنىڭ ءوزى Instagram جەلىسىندە جازدى، دەپ حابارلايدى «ادىرنا» ءتىلشىسى.
«ناتيجە جويىلدى. ءبىز سوڭىنا دەيىن كۇرەستىك. وسىنداي وتكىنشى ەموتسيالار ءۇشىن كەشىرىم سۇرايمىن. مەن ەلگە التىن مەدال سىيلاۋدى قاتتى قالادىم. بىراق قۇدايدىڭ جازعانى باسقا بولدى. بۇل جاعداي مەنى ارمانىمنان باس تارتقىزا المايدى. سوڭىنا دەيىن مەن ءۇشىن كۇرەسكەن بارلىق قاھارمانىما العىس ايتامىن. بۇگىن مەنى مىڭ بولشەككە ءبولىپ تاستادى»، – دەدى ول.
دەسە دە، دۇنيەجۇزىلىك جەڭىل اتلەتيكا فەدەراتسياسىنىڭ تورەشىلەر كوميتەتى بۇل ماسەلەگە قاتىستى تەكسەرۋدىڭ اياقتالعانىن ازىرگە رەسمي تۇردە جاريالاعان جوق.
ەسكە سالايىق، قازاقستاندىق سپورتشىنىڭ التىن مەدالىنە قاتىستى نارازىلىق ونىڭ جارىس كەزىندەگى اياق كيىمىنە بايلانىستى تۇسكەن. قارسىلاستارى توقسانباەۆا كيگەن كروسسوۆكا ۇلگىسىنىڭ World Athletics ۇيىمى بەكىتكەن رۇقسات ەتىلگەن اياق كيىمدەر تىزىمىنە سايكەستىگىنە كۇمان كەلتىرگەن بولاتىن.
