قىرعىزستان پرەزيدەنتى سادىر جاپاروۆ 2027 جىلدىڭ 27 قاڭتارىندا وتەتىن پرەزيدەنت سايلاۋىنا قاتىستى جارلىققا قول قويدى. ەندى مۇعالىمدەر مەن ستۋدەنتتەردى سايلاۋالدى ۇگىت-ناسيحات جۇمىستارىنا تارتۋعا بولمايدى، دەپ حابارلايدى «ادىرنا» ءتىلشىسى 24.kg باسىلىمىنا سىلتەمە جاساپ.
قۇجاتقا سايكەس، كانديداتتاردىڭ پايداسىنا ۇگىت-ناسيحات جۇرگىزۋگە مۇعالىمدەردى، وقۋشىلاردى، وقىتۋشىلاردى، ستۋدەنتتەردى، مەديتسينا قىزمەتكەرلەرىن، الەۋمەتتىك سالا ماماندارىن جانە مەملەكەتتىك ءارى مۋنيتسيپالدىق ۇيىمداردىڭ وزگە دە قىزمەتكەرلەرىن تارتۋعا تىيىم سالىنادى.
مينيسترلەر كابينەتىنە زاڭسىز ۇگىت-ناسيحاتقا قاتىسقان نەمەسە قىزمەتتىك جاعدايىن كانديداتتاردىڭ مۇددەسىنە پايدالانعان لاۋازىمدى تۇلعالاردى تارتىپتىك جاۋاپكەرشىلىككە تارتۋ تاپسىرىلدى. قاجەت بولعان جاعدايدا مۇنداي باسشىلار مەن قىزمەتكەرلەر قىزمەتىنەن بوساتىلادى.
«جارلىق مەملەكەتتىك جانە مۋنيتسيپالدىق ورگانداردىڭ سايلاۋ پروتسەسىنە ارالاسۋىنا، سونداي-اق اكىمشىلىك رەسۋرستاردى پايدالانۋعا جول بەرمەۋگە باعىتتالعان. ورتالىق سايلاۋ كوميسسياسىنا زاڭنامانى ءبىرىزدى قولدانۋ جانە ازاماتتاردى اقپاراتتاندىرۋ بويىنشا قوسىمشا شارالار قابىلداۋ ۇسىنىلدى. قۇجاتتا قىرعىزستان زاڭناماسىنا سايكەس حالىقارالىق بايقاۋشىلاردىڭ قاتىسۋى دا قاراستىرىلعان»، – دەلىنگەن حابارلامادا.
ەسكە سالساق، شامامەن ءبىر اي بۇرىن سادىر جاپاروۆ 2027 جىلعى قاڭتاردا وتەتىن پرەزيدەنت سايلاۋىنا قاتىساتىنىن رەسمي تۇردە راستاعان بولاتىن.
