اعىمداعى جىلدىڭ 6 ايىندا جامبىلدىق كاسىپكەرلىك سۋبەكتىلەرىنە 10,5 ملرد. تەڭگە شاعىن نەسيە بەرىلدى. ەكى مىڭنان استام ازاماتقا 3,3 ملرد. تەڭگە گرانت ءبولىندى.
باق وكىلدەرىمەن كەزدەسۋدە وسىلاي دەگەن وبلىس اكىمى نۇرجان نۇرجىگىتوۆ كاسىپكەرلەرگە جاعداي جاساۋ، مۇمكىنشىلىكتەر ۇسىنۋ، ماسەلەلەرىن شەشۋ – باستى تالاپ ەكەندىگىن اتاپ ءوتتى.
- سالاداعى جۇمىستاردى جەتىلدىرۋ، ينۆەستورلارمەن تىعىز قارىم-قاتىناس ورناتۋ ءارى تيىمدىلىگىن ارتتىرۋ ماقساتىندا 4 ارنايى الاڭ جۇمىسىن ىسكە قوستىق.
بىرىنشىدەن، اپتا سايىن وتەتىن ينۆەستيتسيالىق شتاب جۇمىسىن باستادى. شتاب جۇمىسىنا ءاربىر كاسىپكەر قاتىسىپ، ءوز جوباسىن تانىستىرا الادى. ەكىنشى كەزەكتە، پروكۋراتۋرا جانىنان قۇرىلعان ساراپتامالىق كەڭەستىڭ جۇمىسىن جالعاستىرامىز. ونداعى ماقسات، ءاربىر كاسىپكەردىڭ قۇقىقتارى مەن مۇددەسىن قورعاۋ. ءۇشىنشى، «اتامەكەن» كاسىپكەرلەر پالاتاسى جانىنداعى وڭىرلىك كەڭەس پەن ءتورتىنشى، پالاتا جانىنداعى ىسكەر ايەلدەر كەڭەستەرى دە كاسىپكەرلەرگە قولداۋ كورسەتۋ الاڭىنا اينالاتىن بولادى،-دەدى نۇرجان نۇرجىگىتوۆ.
ونەركاسىپتى دامىتۋ باعىتىندا «تاراز حيميالىق پاركى» ارنايى ەكونوميكالىق ايماعىن دامىتۋ ىسىنە دە ءمان بەرىلۋدە. ونداعى جوبالار تەك حيميالىق جوبالارمەن شەكتەلمەيدى.
بۇگىنگى تاڭدا اتالعان اۋماقتا 3 ينۆەستيتسيالىق جوبانى جۇزەگە اسىرۋعا دەن قويىلۋدا. ولار: «Qazsugar Co» جشس – جىلىنا 150 مىڭ توننا قانت وندىرەتىن زاۋىت قۇرىلىسى، «AltynalmasReagents» جشس – جىلىنا 25 مىڭ تونناعا دەيىن ناتري ءتسيانيدى ءوندىرىسى، «TAS Market» جشس – جىلدىق قۋاتتىلىعى 60 مىڭنان 100 مىڭ تونناعا دەيىن فەرروسيليتسي، فەرروسيليكومارگانەتس، تەحنيكالىق كرەمني، ءتۇستى مەتالل وندىرەتىن مەتاللۋرگيالىق كومبينات قۇرىلىسى.
- جالپى، وبلىستىڭ دامۋ جوسپارىندا ايقىندالعانداي، ونەركاسىپ سالاسىندا جالپى قۇنى 2,1 ترلن. تەڭگەنى قۇرايتىن 443 جوبانى ىسكە قوسىپ، 10,1 مىڭ جاڭا جۇمىس ورىندارىن اشۋ كوزدەلۋدە.
اگروونەركاسىپ كەشەنىن كلاستەرلىك تاسىلمەن دامىتۋ كوزدەلسە، ونەركاسىپ سالاسى ارىپتەستىك باعدارلاما نەگىزىندە ىسكە اسىرىلاتىن بولادى. ارىپتەستىك باعدارلامانى وڭىردەگى ءىرى ينۆەستيتسيالىق جوبالاردا دا قولدانۋدى جوسپارلاپ وتىرمىز،-دەدى ايماق باسشىسى ءوز سوزىندە.
وسى جۇمىستار جۇزەگە اسقان جاعدايدا وبلىستا ەڭبەك ونىمدىلىگى 8,5 پايىزعا، ونەركاسىپ ءونىمىنىڭ كولەمى 275 ملرد. تەڭگەگە ارتىپ، ەكسپورت كولەمى 95,9 ملرد. تەڭگەنى قۇرايتىن بولادى.
سونداي-اق، وڭىردە جۇمىس ىستەپ تۇرعان 77,2 مىڭ شاعىن جانە ورتا بيزنەس سۋبەكتىلەرىن 85 مىڭعا دەيىن جەتكىزىپ، ونداعى جۇمىسپەن قامتىلعانداردىڭ سانىن ارتتىرا وتىرىپ، وندىرىلگەن ءونىم كولەمى 7%-عا ۇلعايادى دەپ جوسپارلانۋدا.
