فوتو: dsns_telegram
28 قىركۇيەك كۇنى كيەۆكە بىرنەشە رەت درون شابۋىلى جاسالدى. شابۋىلداردىڭ ءبىرى ۋكراينا ۇلتتىق عىلىم اكادەمياسىنىڭ ورتالىقتاعى تاريحي عيماراتىنا، ەكىنشىسى «دوبروبۋت» مەديتسينالىق ورتالىعىنا باعىتتالعان. بۇل تۋرالى ۆۆس جازدى، دەپ حابارلايدى "ادىرنا".
كيەۆ مەرى ۆيتالي كليچكونىڭ مالىمەتىنشە، شابۋىلدار سالدارىنان ءبىر ايەل قازا تاۋىپ، كەمىندە 19 ادام جارالانعان. زارداپ شەككەندەردىڭ اراسىندا ءۇش بالا بار.
العاشقى شابۋىل شامامەن ساعات 13:30-دا ۆلاديميرسكايا كوشەسىندە ورنالاسقان عىلىم اكادەمياسىنىڭ ءۇش قاباتتى عيماراتىنا جاسالعان. درون سوققىسىنان كەيىن عيماراتتا ءورت شىعىپ، قۇرىلىسقا ايتارلىقتاي زاقىم كەلگەن. قۇتقارۋشىلار عيمارات ىشىندە بولۋى مۇمكىن ادامداردى ىزدەستىردى.
كەيىن ساعات 15:15 شاماسىندا انتونوۆيچ كوشەسىندەگى «دوبروبۋت» مەديتسينالىق ورتالىعىنا درون سوققىسى تيگەن. ۋكراينالىق باق-تىڭ حابارلاۋىنشا، مۇندا جەتى ادام زارداپ شەككەن. عيماراتتىڭ بىرنەشە قاباتى مەن مەديتسينالىق جابدىقتار زاقىمدانعان.
شابۋىلداردىڭ بىرىندە ۋكراينانىڭ بۇرىنعى ۇلتتىق قاۋىپسىزدىك جانە قورعانىس كەڭەسىنىڭ حاتشىسى ۆلاديمير گوربۋلين دە جەڭىل جاراقات العان. ونىڭ جاعدايىن BBC-گە ەكى دەرەككوز راستاعان. الدىن الا مالىمەت بويىنشا، ونىڭ كومەكشىسى قازا تاپقان.
ۋكراينا بيلىگىنىڭ مالىمەتىنشە، سوڭعى كۇندەرى كيەۆ پەن كيەۆ وبلىسىنا شابۋىلدار جالعاسىپ جاتىر. رەسەي قورعانىس مينيسترلىگى دۇيسەنبى تاڭەرتەڭگى سوققىلاردىڭ نىساناسى كيەۆتەگى ەكى داتا-ورتالىق بولعانىن حابارلاعان. كۇندىزگى شابۋىلدارعا قاتىستى رەسەي تاراپى ازىرگە تۇسىنىكتەمە بەرگەن جوق.
