فوتو:ۇوك
قازاقستاندىق بوكسشى تورەحان سابىرحان 70 كەلىگە دەيىنگى سالماق دارەجەسىندە 2026 جىلعى ازيا ويىندارىنىڭ چەمپيونى اتاندى. فينالدىق كەزدەسۋدە ول يوردانيا وكىلى زەياد يشايشپەن جۇدىرىقتاستى، دەپ حابارلايدى "ادىرنا".
جەكپە-جەك باستالماي تۇرىپ-اق ەكى سپورتشى اراسىندا ەموتسيالىق جاعداي بايقالدى. يوردانيالىق بوكسشى قازاقستاندىقتى كەۋدەسىنەن يتەرىپ جىبەردى. ال گونگ سوعىلعاننان كەيىن قارسىلاستار العاشقى سەكۋندتاردان-اق بەلسەندىلىك تانىتىپ، رينگ ورتاسىندا سوققى الماسۋعا كىرىستى.
بىرتىندەپ سابىرحان اراقاشىقتىقتى ءتيىمدى پايدالانا باستادى. بويىنىڭ ۇزىندىعىن ۇتىمدى قولدانعان قازاقستاندىق ورتا قاشىقتىقتان شابۋىل جاساپ، قارسىلاسىنا مۇمكىندىك بەرمەدى. ءبىرىنشى راۋندتىڭ قورىتىندىسىندا تورەشىلەر جەڭىستى ءبىراۋىزدان سابىرحانعا بەردى.
ەكىنشى راۋندتا يشايش تاكتيكاسىن وزگەرتىپ، جەكپە-جەكتى جاقىن قاشىقتىقتا وتكىزۋگە تىرىستى. ول قازاقستاندىقتى ارقانعا ىعىستىرعانىمەن، سابىرحان قارسى شابۋىلدار ارقىلى قىسىمنان شىعا ءبىلدى. راۋندتىڭ سوڭىنا قاراي قازاقستاندىق باستامانى تولىق ءوز قولىنا الىپ، بەلسەندى شابۋىلعا كوشتى. بۇل كەزەڭدە دە تورەشىلەر ونىڭ باسىمدىعىن مويىندادى.
ءۇشىنشى راۋندتا سابىرحان قارقىنىن تومەندەتپەي، قارسىلاسىنا بىرىنەن سوڭ ءبىرىن ءدال سوققىلارىن باعىتتادى. حۋكتار مەن جىلدام كومبيناتسيالاردى ءساتتى پايدالانعان قازاقستاندىق يشايشتىڭ شابۋىلدارىنان دا قورعانا ءبىلدى.
وسىلايشا ءۇش راۋندتىڭ ناتيجەسى بويىنشا تورەحان سابىرحان تورەشىلەردىڭ ءبىراۋىزدى شەشىمىمەن جەڭىسكە جەتىپ، ازيا ويىندارىنىڭ التىن مەدالىن يەلەندى. بۇل قازاقستان قۇراماسىنىڭ قورجىنىنا تۇسكەن ونىنشى التىن جۇلدە بولدى. سونداي-اق سابىرحان ۇلتتىق قۇرامانىڭ بوكستان وسى تۋرنيردەگى العاشقى جوعارى دارەجەلى مەدالىن جەڭىپ الدى.
بۇعان دەيىن تورەحان سابىرحان شيرەك فينالدا وزبەكستان وكىلى شاۆكاتجون بولتاەۆتى 5:0 ەسەبىمەن جەڭگەن ەدى. كەزدەسۋ بارىسىندا قازاقستاندىق بوكسشى شابۋىلدا بەلسەندىلىك تانىتىپ، قارسىلاسىنىڭ سوققىلارىنا جول بەرمەدى.
تورەحاننىڭ اعاسى ماحمۇد سابىرحان دا جارىستا جۇلدەگە قول جەتكىزدى. ول جارتىلاي فينالدان كەيىن قولا مەدال يەلەندى. الايدا ونىڭ جەڭىلىسىنە قاتىستى تورەشىلەر شەشىمى داۋ تۋدىرعان. قازاقستان بوكس فەدەراتسياسىنىڭ وكىلدەرى بۇل شەشىممەن كەلىسپەيتىنىن مالىمدەدى.
ايتا كەتەيىك، بۇگىن قازاقستان قۇراماسىنىڭ كاپيتانى ايبەك ورالباي دا فينالدىق جەكپە-جەگىن وتكىزەدى. ول ازيا ويىندارىنىڭ التىن مەدالى ءۇشىن وزبەكستاندىق جاحونگير زوكيروۆپەن كەزدەسەدى.
