قازاق ونەرىنە وزىندىك ۇلەسىن قوسقان ءانشى، ونەر قايراتكەرى بولات ابدىاحمەتوۆ دۇنيەدەن ءوتتى. قايعىلى حاباردى ونەر يەسىنىڭ جاقىندارى الەۋمەتتىك جەلىدەگى پاراقشالارىندا جاريالادى، دەپ حابارلايدى "ادىرنا".
«قازاقتىڭ كاسىبي ونەرىنە وزىندىك ۇلەسىن قوسقان، ءبىرتۋار ازامات، كاسىبي ءانشى، ونەر قايراتكەرى بولات ابدىاحمەتوۆتىڭ دۇنيەدەن وتۋىنە بايلانىستى جارىنا، بالا-شاعاسىنا، تۋعان-تۋىستارى مەن جاقىندارىنا قايعىرىپ كوڭىل ايتامىز. بولات ابدىاحمەتوۆ – ماسكەۋدە كاسىبي ءبىلىم الىپ، ونەردىڭ بيىك بەلەستەرىن باعىندىرعان، قازاق مادەنيەتى مەن ونەرىنە ادال قىزمەت ەتكەن زيالى ازامات ەدى. ومىردە اقجارقىن مىنەزىمەن، كورگەندىلىگىمەن، پاراسات-پايىمىمەن ەلىنىڭ قۇرمەتىنە بولەنگەن ابزال جان بولاتىن»، – دەلىنگەن جازبادا.
بولات ابدىاحمەتوۆ اباي وبلىسىنداعى وبلىسىنداعى شار قالاسىندا دۇنيەگە كەلگەن. ماسكەۋ مەملەكەتتىك مۋزىكا ۋچيليششەسىندە ەسترادا جانە دجاز سالاسى بويىنشا ءبىلىم العان. ول ۇزاق جىلدار بويى قازاق مادەنيەتى مەن ونەرىنىڭ دامۋىنا ۇلەس قوسىپ، كورەرمەنگە بىرنەشە تانىمال ءانىن ۇسىندى.
ءانشى كوپشىلىككە «جالاڭاياق قىز»، «سۇلۋىم» سەكىلدى شىعارمالارىمەن كەڭىنەن تانىلدى. مۇقاعالي ماقاتاەۆتىڭ سوزىنە جازىلعان «جالاڭاياق قىز» ءانى ونىڭ شىعارماشىلىق مۇراسىنداعى تانىمال تۋىندىلاردىڭ بىرىنە اينالدى. ءان ورتالىق ازيا ەلدەرىمەن قاتار ەۋروپانىڭ بىرقاتار مەملەكەتتەرىندە دە تىڭدارمان ىقىلاسىنا بولەنگەن.
شىعارماشىلىق قىزمەتى بارىسىندا قازاقستاننان بولەك وزبەكستان، رەسەي، قىتاي جانە تايلاندتا ونەر كورسەتىپ، ءتۇرلى كونتسەرتتىك باعدارلامالارعا قاتىستى.
