وسىدان 95 جىل بۇرىن، 1931 جىلعى 2 قازاندا قازاقتىڭ ۇلى ويشىلى، اقىن ءارى فيلوسوفى شاكارىم قۇدايبەردىۇلى قازا تاپتى.
اقىن ءوزى تۋعان، تۇرعان سەمەي ايماعىنداعى شىڭعىستاۋدا كەرەگەتاس جايلاۋىنىڭ ماڭىندا جازالاۋشى وتريادتىڭ قولىنان وققا ۇشتى. سول كەزدەگى بيلىكتىڭ جەندەتتەرى قارت اقىننىڭ ءمايىتىن كومۋسىز قالدىرىپ، قۇر قۇدىققا تاستاپ كەتتى. 30 جىل قۇدىقتا جاتقان اقىن دەنەسىن كەيىن ۇلى احات قازىپ الىپ، اباي زيراتىنىڭ ماڭىنا جەرلەدى. قازاقستان تاۋەلسىزدىككە يە بولعان سوڭ جيدەبايداعى اباي زيراتىنىڭ سوۆەت كەزىندەگى نۇسقاسى بۇزىلىپ، ورنىنا اباي-شاكارىم كەشەنى سالىندى.
شاكارىمنىڭ ولىمىنە قاتىستى ناقتى دەرەكتەر ۇزاق ۋاقىت بويى جابىق ساقتالىپ، وقيعانىڭ ءمان-جايى تۋرالى ءتۇرلى نۇسقالار تارادى.
1963 جىلى اباي اۋداندىق پارتيا كوميتەتى جانىنان شاكارىمنىڭ ءولىمىن زەرتتەۋ ءۇشىن ارنايى كوميسسيا قۇرىلىپ، ءۇش اي ىشىندە 300-گە جۋىق ادامنان مالىمەت جينالعان. سول كۋالىكتەردىڭ ىشىندە وقيعاعا قاتىسقان ايتمىرزا تۇڭلىكباەۆتىڭ جازبالارى دا بار.
كۋاگەرلەردىڭ ايتۋىنشا، شاكارىم قارۋلى توپپەن بىرگە كەلە جاتقان دەگەن كۇدىكپەن اتىلعان. ول ءوزىن تانىتىپ، قولىن كوتەرىپ، اتىستى توقتاتۋدى سۇراعان. الايدا وق اتىلىپ، اقىن اتىنان قۇلاپ تۇسكەن.
شاكارىمنىڭ ولىمىنە قاتىستى تاعى ءبىر ماڭىزدى دەرەكتى بەردەش ءازىمبايۇلى جەتكىزگەن. ونىڭ ايتۋىنشا، العاشقى ەكى وقتان كەيىن تورجورعا قۇلاپ، شاكارىم ورنىنان تۇرىپ، قولىن جوعارى كوتەرگەن. ارتىنشا ءۇشىنشى وق اتىلىپ، اقىننىڭ قولى سىلق تۇسكەن.
زەرتتەۋشىلەر مەن كۋاگەرلەردىڭ ەستەلىكتەرىنە سۇيەنگەن بىرقاتار ەڭبەكتەردە شاكارىمگە اتىلعان سوڭعى وقتى جازالاۋشى وتريادتىڭ كومانديرى ابزال قاراسارتوۆ شىعارعان دەگەن تۇجىرىم ايتىلادى. دەگەنمەن وقيعانىڭ بارلىق ءمان-جايى تاريحي دەرەكتەردە ءارتۇرلى باياندالىپ كەلەدى.
شاكارىم قۇدايبەردىۇلىنىڭ ءومىرى مەن شىعارماشىلىعى قازاق ادەبيەتى مەن رۋحانياتىندا ايرىقشا ورىن الادى. ول پوەزيا، فيلوسوفيا، تاريح جانە اۋدارما سالالارىندا مول مۇرا قالدىردى.
عۇمىرىنىڭ سوڭىنا دەيىن ادامگەرشىلىك، ادىلەت پەن ار-وجداندى جوعارى قويعان ويشىلدىڭ ەسىمى بۇگىندە قازاق حالقىنىڭ رۋحاني تاريحىمەن تىعىز بايلانىستى.
