جەتىسۋ وبلىسىندا قىزمەتتىك مىندەتىن اتقارۋ بارىسىندا ەكى پوليتسيا قىزمەتكەرى قازا تاپتى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسىنىڭ ىشكى ىستەر ءمينيسترى ەرجان سادەنوۆ مالىمدەدى.
«تالدىقورعان – تەكەلى اۆتوجولىندا ورىن العان جول-كولىك وقيعاسىنا قاتىستى قىلمىستىق ءىس قوزعالدى. جول اپاتى سالدارىنان كولىكتەگى جۇرگىزۋشى مەن جولاۋشى – قىزمەتتىك مىندەتىن اتقارىپ جۇرگەن ىشكى ىستەر ورگاندارىنىڭ قىزمەتكەرلەرى وقيعا ورنىندا قازا تاپتى»، – دەپ مالىمدەدى جەتىسۋ وبلىسى پوليتسيا دەپارتامەنتى.
«قىزمەتتىك مىندەتىن اتقارۋ كەزىندە جول اپاتىنان قازا تاپقان جەتىسۋ وبلىسى پوليتسيا دەپارتامەنتىنىڭ قىزمەتكەرلەرى – پوليتسيا مايورى ارنۇر الحانوۆ پەن پوليتسيانىڭ اعا لەيتەنانتى شىڭعىس اسىلبەكوۆتىڭ تۋعان-تۋىستارى مەن جاقىندارىنا قايعىرىپ كوڭىل ايتامىن. ولاردىڭ ەسىمدەرى ءاردايىم ارىپتەستەرىنىڭ جادىندا ساقتالادى»، – دەپ جازدى ەرجان سادەنوۆ Instagram پاراقشاسىندا.
مينيستر سونداي-اق ىشكى ىستەر مينيسترلىگى قازا تاپقان قىزمەتكەرلەردىڭ وتباسىنا قاجەتتى كومەك كورسەتەتىنىن اتاپ ءوتتى.
