پاۆلودار وبلىسىنىڭ اقتوعاي اۋدانىنداعى جولامان اۋىلىندا ورنالاسقان Aqtogai Milk جشس اۋماعىندا قايعىلى وقيعا ورىن الدى، دەپ حابارلايدى "ادىرنا".
الدىن الا مالىمەتتەرگە سايكەس، كاسىپورىن اۋماعىنداعى كارىز قۇدىعىندا ورنالاسقان ەلەكتر سورعىسىن جوندەۋ كەزىندە التى جۇمىسشى كوز جۇمىپ، تاعى ءبىر ادام ءتۇرلى دارەجەدە زارداپ شەككەن.
وبلىستىق جەدەل مەديتسينالىق جاردەم ستانساسىنىڭ حابارلاۋىنشا، وقيعا تۋرالى حابارلاما 20 شىلدە كۇنى ساعات 12:01-دە تۇسكەن. وقيعا ورنىنا جەتكەن دارىگەرلەر 1963, 1975, 1983, 1998, 2006 جانە 2009 جىلى تۋعان التى ەر ادامنىڭ وقيعا ورنىندا قازا بولعانىن تىركەگەن.
ال 1988 جىلى تۋعان تاعى ءبىر جۇمىسشى اقتوعاي اۋداندىق اۋرۋحاناسىنا جەتكىزىلدى. دارىگەرلەر وعان ورتاشا اۋىرلىقتاعى كومىرقىشقىل گازىمەن ۋلانۋ دياگنوزىن قويعان. قازىرگى ۋاقىتتا ناۋقاس قاجەتتى ەم قابىلداپ جاتىر. دارىگەرلەردىڭ ايتۋىنشا، ونىڭ جاعدايى تۇراقتى، سوندىقتان وبلىس ورتالىعىنا جەتكىزۋ قاجەتتىلىگى جوق.
پاۆلودار وبلىستىق پوليتسيا دەپارتامەنتى اتالعان وقيعاعا بايلانىستى قىلمىستىق ءىس قوزعالعانىن مالىمدەدى.
«وسى فاكتى بويىنشا قىلمىستىق ءىس تىركەلدى. قازاقستان رەسپۋبليكاسى قىلمىستىق-پروتسەستىك كودەكسىنىڭ 201-بابىنا سايكەس تەرگەۋ مۇددەسىنە بايلانىستى وزگە اقپارات جاريا ەتىلمەيدى»، – دەپ حابارلادى ۆەدومستۆو.
قازىرگى ۋاقىتتا وقيعانىڭ ناقتى سەبەپتەرى مەن ءمان-جايىن انىقتاۋ ءۇشىن تەرگەۋ امالدارى جۇرگىزىلىپ جاتىر.
