فوتو: ISRAEL FOREIGN MINISTRY
دۋبايدان تەل-اۆيۆكە ۇشىپ بارا جاتقان Flydubai اۋە كومپانياسىنىڭ رەيسىندەگى ەكىنشى ۇشقىش تەراكت جاساۋعا ارەكەتتەنىپ، اۋە كەمەسىنىڭ كومانديرى سميت ماچچحارعا پىشاقپەن ەمەس، ۇشقىشتار كابيناسىنداعى اۆاريالىق بالتامەن شابۋىل جاساعان. بۇل تۋرالى سەنبى كۇنى بىرىككەن اراب امىرلىكتەرىنىڭ باس پروكۋرورى مالىمدەدى، دەپ حابارلايدى “ادىرنا” پورتالى ۆۆس-گە سىلتەپ.
«ەكىنشى ۇشقىش ۇشۋ كەزىندە ءوز جوسپارىن جۇزەگە اسىرۋعا كىرىستى. ول كابينادا ەكيپاج كومانديرىنە اۆاريالىق بالتامەن شابۋىل جاساپ، ۇشاقتى باسقارۋدى ءوز قولىنا الۋعا ارەكەتتەندى»، – دەپ ءباا باس پروكۋرورى حاماد سەيف اش-ءشامسيدىڭ ءسوزىن ەلدىڭ مەملەكەتتىك WAM اگەنتتىگى كەلتىردى.
اۆاريالىق بالتالار ادەتتە توتەنشە جاعدايلار كەزىندە پايدالانۋ ءۇشىن ۇشاق كابينالارىندا ساقتالادى. ساراپشىلاردىڭ ايتۋىنشا، ولار كوبىنە ەكىنشى ۇشقىشتىڭ ورىندىعىنىڭ ارتىندا ورنالاسادى.
بۇعان دەيىن ماچچحارعا پىشاقپەن شابۋىل جاسالعان بولۋى مۇمكىن دەگەن اقپارات تاراعان ەدى.
ءباا باس پروكۋرورى ەكىنشى ۇشقىشتىڭ اتى-ءجونىن جاريالاعان جوق. بۇعان دەيىن يزرايل بيلىگى ونىڭ ومان ازاماتى ەكەنىن مالىمدەگەن.
Associated Press پەن Reuters اگەنتتىكتەرى ءوز دەرەككوزدەرىنە سىلتەمە جاساپ، ەكىنشى ۇشقىشتىڭ ومان ازاماتى حامام ءال-حاممامي بولعانىن حابارلادى.
پارسى شىعاناعىنداعى ەلدەردىڭ ءبىرىنىڭ ديپلوماتى AP اگەنتتىگىنە بەرگەن مالىمەتىندە، قازىر تەرگەۋ ونىڭ جالعىز ءوزى ارەكەت ەتكەن-ەتپەگەنىن نەمەسە ەكسترەميستىك توپتارمەن بايلانىسى بار-جوعىن انىقتاپ جاتقانىن ايتتى.
حامام ءال-حاممامي ۇلىبريتانياداعى Buckinghamshire New University ۋنيۆەرسيتەتىندە ءۇش جىل قاشىقتان ءبىلىم الىپ، 2023 جىلى «اۆياتسيانى باسقارۋ» ماماندىعى بويىنشا ديپلوم العان. ۋنيۆەرسيتەت وكىلدەرى ونىڭ بۇل وقۋ ورنىندا ۇشقىشتىق دايارلىقتان وتپەگەنىن ناقتىلادى.
AP دەرەككوزىنە سايكەس، وعان ەكسترەميستىك كوزقاراستى ۇستانۋى مۇمكىن دەگەن كۇدىككە بايلانىستى وماندا ۇشۋعا تىيىم سالىنعان. الايدا كەيىن ول Flydubai اۋە كومپانياسىنا جۇمىسقا قابىلدانعان.
ونى جۇمىسقا قابىلداۋ كەزىندە كانديداتۋراسى قانشالىقتى مۇقيات تەكسەرىلگەنى ازىرگە بەلگىسىز.
ەسكە سالساق، وقيعا 30 قىركۇيەك كۇنى تاڭەرتەڭ تىركەلگەن. ۇشاق كابيناسىندا بولعان وقيعادان كەيىن ەكيپاج توتەنشە جاعداي تۋرالى بەلگى بەرىپ، ساۋد ارابياسىنداعى تابۋك اۋەجايىنا شۇعىل قونعان. بورتتاعى جولاۋشىلاردىڭ بارلىعى امان-ەسەن ءتۇسىرىلىپ، سول كۇنى كەشكە Flydubai-دىڭ باسقا رەيسىمەن يزرايلگە جەتكىزىلگەن.
يزرايل بيلىگى مەن جولاۋشىلاردىڭ حابارلاۋىنشا، ەكىنشى ۇشقىش اۋە كەمەسىنىڭ كومانديرىنە پىشاق سۇققان. وسىدان كەيىن ۇشاق كۇرت تومەندەي باستاعان. سول كەزدە جولاۋشىلار شابۋىل جاساعان ۇشقىشتى ۇستاپ، ونى زالالسىزداندىرعان.
ال جۇما كۇنى ەكيپاج كومانديرى، ۇندىستاندىق ۇشقىش سميت ماچچحار ءۇندىستان پرەمەر-ءمينيسترى نارەندرا موديمەن بەينەبايلانىس كەزىندە وقيعادان كەيىن العاش رەت ۇشقىشتار كابيناسىندا نە بولعانىن ايتىپ بەرگەن ەدى. ونىڭ سوزىنشە، ول ەسىكتى اشقانعا دەيىن اۋىر جاراقات العان.
«مەن ەدەندە جارالانىپ جاتتىم. بىراق وزىمە: قانداي جاعداي بولسا دا، ىشتەن ەسىكتى اشۋىم كەرەك، دەدىم. باسقا ادامدار كابيناعا كىرىپ، جاعدايدى باقىلاۋعا الۋى ءۇشىن وسىلاي جاساۋ قاجەت بولدى. ارينە، مەن ءوز ءومىرىم ءۇشىن كۇرەستىم. سونىمەن بىرگە باسقا ادامداردىڭ قازا بولۋىنا جول بەرگىم كەلمەدى»، - دەدى ول.
ماچچحارعا ۇشاق بورتىندا العاشقى مەديتسينالىق كومەك كورسەتكەن يزرايلدىك دارىگەر ۇشقىشتىڭ كوپ قان جوعالتقانىن ايتقان.
