قازاقستان 2026 جىلعى جاپونيادا وتكەن ازيا ويىندارىن 84 مەدالمەن اياقتادى. بۇل تۋرالى ۇلتتىق وليمپيادا كوميتەتىنىڭ (ۇوك) ءباسپاسوز قىزمەتى مالىمدەدى، دەپ حابارلايدى "ادىرنا".
قازاقستان قۇراماسى جاپونيانىڭ ايتي جانە ناگويا قالالارىندا وتكەن XX جازعى ازيا ويىندارىندا 12 التىن، 24 كۇمىس جانە 48 قولا مەدال جەڭىپ الدى. ناتيجەسىندە ۇلتتىق قۇراما جالپى كوماندالىق ەسەپتە 8-ورىنعا تۇراقتادى.
قازاقستان الدىڭعى ازيا ويىندارىمەن سالىستىرعاندا ناتيجەسىن جاقسارتتى. 2022 جىلى حانچجوۋدا وتكەن دودادا قازاقستاندىق سپورتشىلار 80 مەدالمەن 11-ورىن العان ەدى. ونىڭ ىشىندە 10 التىن جۇلدە بولدى.
جاپونيادا قازاقستان قۇراماسى بىردەن ءۇش ساتىعا كوتەرىلىپ، مەدالدار سانىن 84-كە جەتكىزدى. ەل سپورتشىلارى ءدال وسىنداي مولشەردەگى جۇلدەنى 2014 جىلى ينچحوندا وتكەن ازيا ويىندارىندا دا جەڭىپ العان. ال ەڭ كوپ مەدال 2006 جىلعى دوحاداعى ازيا ويىندارىندا ەنشىلەنىپ، قازاقستاندىق سپورتشىلار 85 جۇلدە العان بولاتىن.
مەدال سانى بويىنشا قازاقستان ءۇشىن ەڭ ناتيجەلى سپورت تۇرلەرى دزيۋدو مەن كۇرەس بولدى. بۇل سپورت تۇرلەرىنىڭ ارقايسىسىندا 7 مەدالدان جەڭىپ الىندى. بايداركا مەن كانوەدە ەسۋ سپورتشىلارى 6 مەدال ەنشىلەدى. ال سەمسەرلەسۋ، بوكس جانە دجيۋ-دجيتسۋدان قازاقستان قورجىنىنا 5 مەدالدان ءتۇستى.
جالپى كوماندالىق ەسەپتە قىتاي قۇراماسى ءبىرىنشى ورىن الدى. قىتاي سپورتشىلارى 169 التىن، 89 كۇمىس جانە 83 قولا مەدال جەڭىپ الدى.
ەكىنشى ورىن جاپونياعا بۇيىردى. قابىلداۋشى ەلدىڭ سپورتشىلارى 83 التىن، 95 كۇمىس جانە 91 قولا مەدال يەلەندى.
ءۇشىنشى ورىندا وڭتۇستىك كورەيا ورنالاستى. ونىڭ قورجىنىندا 39 التىن، 43 كۇمىس جانە 68 قولا جۇلدە بار.
