Qazaqstan 2026 jylǧy Japoniiada ötken Aziia oiyndaryn 84 medalmen aiaqtady. Būl turaly Ūlttyq Olimpiada komitetınıŋ (ŪOK) baspasöz qyzmetı mälımdedı, dep habarlaidy "Adyrna".
Qazaqstan qūramasy Japoniianyŋ Aiti jäne Nagoia qalalarynda ötken XX jazǧy Aziia oiyndarynda 12 altyn, 24 kümıs jäne 48 qola medal jeŋıp aldy. Nätijesınde ūlttyq qūrama jalpy komandalyq esepte 8-orynǧa tūraqtady.
Qazaqstan aldyŋǧy Aziia oiyndarymen salystyrǧanda nätijesın jaqsartty. 2022 jyly Hanchjouda ötken dodada qazaqstandyq sportşylar 80 medalmen 11-oryn alǧan edı. Onyŋ ışınde 10 altyn jülde boldy.
Japoniiada Qazaqstan qūramasy bırden üş satyǧa köterılıp, medaldar sanyn 84-ke jetkızdı. El sportşylary däl osyndai mölşerdegı jüldenı 2014 jyly İnchhonda ötken Aziia oiyndarynda da jeŋıp alǧan. Al eŋ köp medal 2006 jylǧy Dohadaǧy Aziia oiyndarynda enşılenıp, qazaqstandyq sportşylar 85 jülde alǧan bolatyn.
Medal sany boiynşa Qazaqstan üşın eŋ nätijelı sport türlerı dziudo men küres boldy. Būl sport türlerınıŋ ärqaisysynda 7 medaldan jeŋıp alyndy. Baidarka men kanoede esu sportşylary 6 medal enşıledı. Al semserlesu, boks jäne djiu-djitsudan Qazaqstan qorjynyna 5 medaldan tüstı.
Jalpy komandalyq esepte Qytai qūramasy bırınşı oryn aldy. Qytai sportşylary 169 altyn, 89 kümıs jäne 83 qola medal jeŋıp aldy.
Ekınşı oryn Japoniiaǧa būiyrdy. Qabyldauşy eldıŋ sportşylary 83 altyn, 95 kümıs jäne 91 qola medal ielendı.
Üşınşı orynda Oŋtüstık Koreia ornalasty. Onyŋ qorjynynda 39 altyn, 43 kümıs jäne 68 qola jülde bar.
