فوتو: اشىق دەرەككوزدەن
ءتىل ماسەلەسىن ءجيى كوتەرىپ جۇرگەن جۋرناليست جالعاس ەرتاي قازاقستان كينوتەاترلارىندا كەڭ پروكاتقا شىعاتىن شەتەلدىك فيلمدەردىڭ قازاق تىلىندەگى تولىق دۋبلياجدالعان نۇسقاسىن مىندەتتەۋدى ۇسىندى. وسى باستاماعا بايلانىستى ول پەتيتسيا جاريالاپ، مادەنيەت جانە اقپارات مينيسترلىگىن «كينەماتوگرافيا تۋرالى» زاڭعا وزگەرىس ەنگىزۋگە شاقىردى، دەپ حابارلايدى "ادىرنا".
پەتيتسيا اۆتورىنىڭ ايتۋىنشا، قولدانىستاعى زاڭ فيلمدەردى قازاق تىلىنە اۋدارۋدى تالاپ ەتەدى. الايدا زاڭدا تولىققاندى دۋبلياج مىندەتتى دەگەن ناقتى تالاپ جوق. قازىر ديستريبيۋتورلار ءفيلمدى قازاقشا سۋبتيترمەن نەمەسە كادر سىرتىنداعى اۋدارمامەن ۇسىنا الادى.
جالعاس ەرتايدىڭ پىكىرىنشە، مۇنداي تالاپتىڭ بولماۋى قازاق تىلىندەگى دۋبلياجدىڭ قازاقستانداعى تۇراقتى كينوپروكات ستاندارتىنا اينالۋىنا كەدەرگى كەلتىرىپ وتىر. سونىڭ سالدارىنان كوپتەگەن ءفيلمنىڭ قازاقشا دىبىستالعان نۇسقاسى كورەرمەنگە ۇسىنىلمايدى.
پەتيتسيادا قازاق تىلىندەگى دۋبلياجدىڭ كوممەرتسيالىق تۇرعىدان دا سۇرانىسقا يە ەكەنى اتاپ وتىلگەن. اۆتور بۇعان Disney-ءدىڭ «موانا 2» ءمۋلتفيلمىن مىسال رەتىندە كەلتىرەدى. پەتيتسياداعى دەرەككە سايكەس، ونىڭ قازاقشا نۇسقاسى 12 كۇن ىشىندە 151 ملن تەڭگەدەن استام كاسسا جيناپ، قازاقستانداعى جالپى بوكس-ءوفيستىڭ 12 پايىزىن قۇراعان.
سونداي-اق «ويجۇمباق 2» ءفيلمىنىڭ قازاقشا نۇسقاسى العاشقى ءتورت كۇندە 40 ملن تەڭگەدەن استام تابىس اكەلگەنى كورسەتىلگەن.
اۆتور بۇل كورسەتكىشتەر قازاقشا دۋبلياجعا كورەرمەن تاراپىنان ناقتى سۇرانىس بار ەكەنىن دالەلدەيدى دەپ سانايدى. ونىڭ پايىمداۋىنشا، تۇراقتى ۇسىنىس قالىپتاسسا، دۋبلياج نارىعى دا وزدىگىنەن دامىپ، سالا ماماندارىنا تۇراقتى جۇمىس پەن تاپسىرىس پايدا بولادى.
پەتيتسيادا بالالار مەن وتباسىلىق فيلمدەرگە ەرەكشە نازار اۋدارىلعان. سەبەبى كىشكەنتاي كورەرمەندەر ءسۋبتيتردى تولىق وقىپ، ءفيلمدى قابىلداي المايدى. سوندىقتان مۇنداي تۋىندىلاردىڭ قازاقشا دىبىستالۋى ماڭىزدى ەكەنى ايتىلعان.
قانداي وزگەرىس ۇسىنىلدى؟
جالعاس ەرتاي «كينەماتوگرافيا تۋرالى» زاڭنىڭ 9-بابىنا وزگەرىس ەنگىزىپ، شەكتەۋلى پروكاتتى قوسپاعاندا، تۇپنۇسقا ءتىلى قازاقشا ەمەس فيلمدەردىڭ مەملەكەتتىك تىلدەگى دۋبلياجدالعان نۇسقاسىن مىندەتتەۋدى سۇرايدى.
ۇسىنىسقا سايكەس:
- قازاقشا دۋبلياج ءفيلمنىڭ قازاقستانداعى نەگىزگى پروكاتىمەن ءبىر ۋاقىتتا قولجەتىمدى بولۋى كەرەك;
- سۋبتيتر مەن كادر سىرتىنداعى اۋدارما قوسىمشا نۇسقا رەتىندە ساقتالۋى ءتيىس;
- شەكتەۋلى پروكاتتاعى فيلمدەرگە بولەك تالاپ بەلگىلەنۋى مۇمكىن;
- كينوتەاترلار مەن ديستريبيۋتورلارعا جاڭا تالاپتارعا بەيىمدەلۋ ءۇشىن وتپەلى كەزەڭ بەرىلۋى قاجەت.
پەتيتسيا اۆتورى بۇل باستاما وزگە تىلدەردەگى فيلمدەردى كورسەتۋگە شەكتەۋ قويۋدى كوزدەمەيتىنىن اتاپ ءوتتى. نەگىزگى ماقسات – قازاقستاندىق كورەرمەننىڭ الەمدىك كينونى مەملەكەتتىك تىلدە تولىققاندى تاماشالاۋ مۇمكىندىگىن كەڭەيتۋ جانە ەلدەگى دۋبلياج يندۋسترياسىن دامىتۋ.
سونداي-اق جۋرناليست مادەنيەت جانە اقپارات مينيسترلىگىن ۇسىنىستاردى قاراستىرىپ، قولدانىستاعى زاڭناماعا ءتيىستى وزگەرىستەر ەنگىزۋگە شاقىردى.
