پرەزيدەنتتىك سايلاۋعا تۇسكەنىنەن بەرى باسى داۋدان ارىلماعان دەپۋتات دايراباەۆتىڭ وكىلدىگىن بوساتۋىن تالاپ ەتكەندەر پەتيتسيا جاريالاندى، دەپ حابارلايدى ادىرنا ۇلتتىق پورتالى Azattyq Ruhy-نا سىلتەمە جاساپ.
پەتيتسيا اۆتورى دەپۋتاتتىڭ ەكى ۇلى جەمقورلىقپەن ۇستالعانىن، مەملەكەتكە كەلتىرىلگەن 550 ميلليون تەڭگەلىك شىعىندى قالپىنا كەلتىرىلمەگەنىن جازعان. وعان قوسا دايراباەۆتىڭ ءوز ۇلدارىن جاقتاپ، قورعاپ سويلەگەنىن سوككەن.
سونىمەن قاتار، پەتيتسيادا دايراباەۆتىڭ ۇلدارىنا قاتىستى جانجالدا دەپۋتاتتىڭ دا اتى-ءجونى ايتىلعانى جازىلعان.
«كومپانيا ءوز ەلدى مەكەنىندە الاياقتىق جولمەن 10 مىڭ گەكتار جەردى يەمدەنگەن. اۋىل تۇرعىندارىنا ديۆيدەندتەر ۋادە ەتىلدى. الايدا ولار ەشقانداي پايدا تاپپادى. بۇل ماسەلەدە ماجىلىسمەن جيگۋلي دايراباەۆتىڭ ەسىمى دە اتالدى. الايدا دەپۋتات بۇل الاياقتىققا قاتىسى بار ەكەنىن كوپشىلىك الدىندا جوققا شىعاردى»، — دەلىنگەن پەتيتسيادا.
بۇگىندە پەتيتسيامەن 1531 ادام كەلىسكەن. پەتيتسيانى قولداعان ازاماتتار دەپۋتات جيگۋلي دايراباەۆتىڭ ءوز وكىلەتتىگىنەن باس تارتۋى كەرەك دەپ سانايدى.
بۇعان دەيىن جيگۋلي دايراباەۆ قىر سوڭىنان قالماي، سىن جاۋدىرىپ جاتقانداردىڭ كىم ەكەنىن بىلەمىن دەگەن ەدى.
ەسكە سالا كەتەيىك، "اۋىل" پارتياسى بۇعان دەيىن دە دايراباەۆتىڭ مانداتىن تاپسىرمايتىنىن ايتقان.
«دايراباەۆ دەپۋتاتتىق مانداتىن تاپسىرمايدى. مەن فراكتسيانىڭ مالىمدەمەسىن ايتىپ وتىرمىن. ءبىز وعان ەشقانداي ءمىن تاعا المايمىز. بىرىنشىدەن، ونىڭ جەكە باسىنا قاتىستى اتالعان ىستە ەشتەڭە ايتىلماعان. ەكىنشىدەن، ونىڭ بالالارى ەرەسەك ازاماتتار. ولار ءوز ىسىنە وزدەرى جاۋاپ بەرۋى كەرەك»،— دەدى باققوجاەۆ.
جيگۋلي دايراباەۆتىڭ ءوزى بالالارىنا جاقتاسىپ، سوڭىنا دەيىن كۇرەسەتىنىن ءمالىم ەتكەن بولاتىن-تۇعىن.
«بالالارىمدى كىنالى دەپ ەسەپتەمەيمىن، ولار ادىلدىك ءۇشىن كۇرەسەدى. اپەللياتسيالىق سوتقا جۇگىنىپ، ابىرويىن قورعاۋعا مۇددەلى. ەندەشە، مەن ماجىلىستەن نە ءۇشىن كەتۋىم كەرەك؟ اۋىل تۇرعىندارى، شارۋالار، ءوزىمدى سايلاعان «اۋىل» پارتياسى ماعان ۇلكەن ءۇمىت ارتىپ وتىر. كوپتەگەن وتكىر ماسەلەلەردى قولعا الىپ، جۇمىس ىستەۋىم كەرەك»، - دەدى دايراباەۆ.
بۇدان بۇرىن حابارلانعانداي، تاراز قالاسىنىڭ سوتى الاياقتىق جاسادى جانە ءىرى مولشەردە اقشا جىمقىردى دەپ ايىپتاپ، ۇكىم شىعارعان ەكى كۇدىكتىنىڭ جيگۋلي دايراباەۆتىڭ ۇلدارى ەكەنى بەلگىلى بولدى.
Azattyq Ruhy-نىڭ حابارلاۋىنشا، دەپۋتاتتىڭ قوس ۇلى مەملەكەتكە كەلتىرگەن شىعىندى ءالى وتەمەگەن. دايراباەۆ ۇلدارىنىڭ ەش كىناسى جوعىن ايتىپ، ماجىلىستەن كەتپەيتىندىگىن مالىمدەدى. دەگەنمەن وعان قازاقستاندىقتار قارسىلىق تانىتىپ، كونبەي وتىر.
"ادىرنا" ۇلتتىق پورتالى
