ماڭعىستاۋ وبلىسىندا كاسپي تەڭىزى ارقىلى قازاقستاننىڭ مەملەكەتتىك شەكاراسىن زاڭسىز كەسىپ وتكەن يراننىڭ ءۇش ازاماتىنا قاتىستى سوت ۇكىمى شىقتى، دەپ حابارلايدى "ادىرنا".
وقيعا 24 شىلدەدە بولعان. يران ازاماتتارى كاسپي تەڭىزىندە بالىق اۋلاپ ءجۇرىپ، مەملەكەتتىك شەكارانى وتكىزۋ پۋنكتىنەن تىس جەردە زاڭسىز كەسىپ وتكەن. ولاردى ۇلتتىق قاۋىپسىزدىك كوميتەتى شەكارا قىزمەتىنىڭ اسكەري قىزمەتشىلەرى ۇستاعان.
اتالعان فاكتى بويىنشا قازاقستان قىلمىستىق كودەكسىنىڭ 392-بابى 1-1-بولىگىمەن قىلمىستىق ءىس قوزعالدى. بۇل باپ ادامدار توبىنىڭ الدىن الا ءسوز بايلاسۋى بويىنشا مەملەكەتتىك شەكارانى وتكىزۋ پۋنكتتەرىنەن تىس جەردە قاساقانا زاڭسىز كەسىپ ءوتۋدى كوزدەيدى.
قاراقيا اۋداندىق سوتى ءۇش ازاماتتى كىنالى دەپ تانىپ، ارقايسىسىنا ءبىر جىل باس بوستاندىعىنان ايىرۋ جازاسىن تاعايىندادى. سونىمەن قاتار ولار جازاسىن وتەگەننەن كەيىن قازاقستان اۋماعىنان شىعارىلۋعا ءتيىس.
سوت ۇكىمى ازىرگە زاڭدى كۇشىنە ەنگەن جوق.
پروكۋراتۋرانىڭ مالىمەتىنشە، مەملەكەتتىك شەكارانى بەلگىلەنگەن وتكىزۋ پۋنكتتەرىنەن تىس جەردە زاڭسىز كەسىپ ءوتۋ زاڭنامادا كوزدەلگەن جاۋاپكەرشىلىككە اكەپ سوعادى.
ايتا كەتەيىك، كاسپي تەڭىزى ارقىلى قازاقستاننىڭ وڭتۇستىك جاعالاۋىنان يراننىڭ سولتۇستىك جاعالاۋىنا دەيىنگى ەڭ قىسقا قاشىقتىق شامامەن 700–750 شاقىرىمدى قۇرايدى. ال اقتاۋ پورتىنان يراننىڭ ەنزەلي نەمەسە اميراباد پورتتارىنا دەيىنگى تەڭىز جولىنىڭ ۇزىندىعى شامامەن 850–900 شاقىرىم، ياعني 460–480 تەڭىز ميلىنە جۋىق.
