گەرمانيا پوليتسياسى ەلدىڭ سىرتقى بارلاۋ قىزمەتىن بۇرىن باسقارعان اۆگۋست حاننينگ پەن ونىڭ بۇرىنعى اپپارات باسشىسى مانفرەد د.-نى تىڭشىلىق جانە مەملەكەتكە وپاسىزدىق جاساۋ ارەكەتىنە كۇدىكپەن ۇستادى، دەپ حابارلايدى "ادىرنا" ءتىلشىسى.
گەرمانيانىڭ باس پروكۋراتۋراسى حابارلاعانداي، 80 جاستاعى اۆگۋست حاننينگ سولتۇستىك رەين-ۆەستفاليا جەرىندە، ال 64 جاستاعى مانفرەد د. باۆاريادا ۇستالعان. سونىمەن قاتار ولاردىڭ ۇيلەرىندە جانە بەرليندە ءتىنتۋ جۇرگىزىلگەن.
اۆگۋست حاننينگ 1998–2005 جىلدارى گەرمانيانىڭ فەدەرالدىق بارلاۋ قىزمەتىن باسقارعان. كەيىن 2005–2009 جىلدارى ىشكى ىستەر مينيسترلىگىندە مەملەكەتتىك حاتشى قىزمەتىن اتقارعان. مانفرەد د. وسى كەزەڭدە ونىڭ اپپاراتىن باسقارعان. 2012 جىلدان 2026 جىلدىڭ ناۋرىزىنا دەيىن ول بارلاۋ قىزمەتىنىڭ وزگە باسشىلارىنىڭ اپپارات جەتەكشىسى بولعان.
تەرگەۋ نۇسقاسىنا سايكەس، حاننينگ 2010 جىلدىڭ كوكتەمىندە مانفرەد د.-دان بارلاۋ قىزمەتىنىڭ قىزمەتكەرى رەتىندە قول جەتكىزە الاتىن بارلاۋ اقپاراتتارىن بەرۋدى سۇراعان. پروكۋراتۋرانىڭ مالىمەتىنشە، بۇرىنعى بارلاۋ باسشىسى بۇل دەرەكتەردى جەكە كونسالتينگتىك قىزمەتىندە پايدالانىپ، ودان تابىس تابۋدى كوزدەگەن.
تەرگەۋ دەرەگىنشە، 2022 جىلدىڭ ماۋسىمىنا دەيىن مانفرەد د. حاننينگكە شامامەن 2 مىڭ قۇجات بەرگەن. ولاردىڭ اراسىندا قۇپيا جانە تەك بارلاۋ قىزمەتىنىڭ ىشىندە پايدالانۋعا ارنالعان ماتەريالدار بولعان. اقپاراتتىڭ ءبىر بولىگى گەرمانيا باسشىلىعىنا ارنالعان بريفينگتەردى دايىنداۋدا قولدانىلعان.
پروكۋراتۋرانىڭ مالىمەتىنشە، حاننينگ العان قۇپيا اقپاراتتىڭ ءبىرىن شەتەلدىك ارنايى قىزمەت وكىلىنىڭ تاپسىرىسى بويىنشا تالدامالىق ماتەريال ازىرلەۋگە پايدالانعان. الايدا گەرمانيا پروكۋراتۋراسى اتالعان شەتەلدىك مەملەكەتتىڭ اتاۋىن جاريالاعان جوق. بۇل ماتەريالدىڭ تاپسىرىس بەرۋشىگە بەرىلگەن-بەرىلمەگەنى ازىرگە انىقتالماعان.
سونىمەن قاتار تەرگەۋ بارىسىندا حاننينگتىڭ باسقا مەملەكەتتىڭ ارنايى قىزمەت وكىلىمەن بايلانىستا بولعانى انىقتالعانى ايتىلدى. پروكۋراتۋرانىڭ نۇسقاسى بويىنشا، بۇرىنعى بارلاۋ قىزمەتىنىڭ باسشىسى بىرنەشە جىل بويى وعان ساياسي سيپاتتاعى اقپارات بەرگەن. ونىڭ ءبىر بولىگى مانفرەد د.-دان الىنعان ماتەريالدارعا نەگىزدەلگەن.
قازىر ءىس بويىنشا تەرگەۋ جالعاسىپ جاتىر. كۇدىكتىلەردىڭ ارەكەتىنە قۇقىقتىق باعا تەرگەۋ ناتيجەسى بويىنشا بەرىلمەك.
