Germaniia polisiiasy eldıŋ syrtqy barlau qyzmetın būryn basqarǧan Avgust Hanning pen onyŋ būrynǧy apparat basşysy Manfred D.-ny tyŋşylyq jäne memleketke opasyzdyq jasau äreketıne küdıkpen ūstady, dep habarlaidy "Adyrna" tılşısı.
Germaniianyŋ bas prokuraturasy habarlaǧandai, 80 jastaǧy Avgust Hanning Soltüstık Rein-Vestfaliia jerınde, al 64 jastaǧy Manfred D. Bavariiada ūstalǧan. Sonymen qatar olardyŋ üilerınde jäne Berlinde tıntu jürgızılgen.
Avgust Hanning 1998–2005 jyldary Germaniianyŋ federaldyq barlau qyzmetın basqarǧan. Keiın 2005–2009 jyldary ışkı ıster ministrlıgınde memlekettık hatşy qyzmetın atqarǧan. Manfred D. osy kezeŋde onyŋ apparatyn basqarǧan. 2012 jyldan 2026 jyldyŋ nauryzyna deiın ol barlau qyzmetınıŋ özge basşylarynyŋ apparat jetekşısı bolǧan.
Tergeu nūsqasyna säikes, Hanning 2010 jyldyŋ köktemınde Manfred D.-dan barlau qyzmetınıŋ qyzmetkerı retınde qol jetkıze alatyn barlau aqparattaryn berudı sūraǧan. Prokuraturanyŋ mälımetınşe, būrynǧy barlau basşysy būl derekterdı jeke konsaltingtık qyzmetınde paidalanyp, odan tabys tabudy közdegen.
Tergeu deregınşe, 2022 jyldyŋ mausymyna deiın Manfred D. Hanningke şamamen 2 myŋ qūjat bergen. Olardyŋ arasynda qūpiia jäne tek barlau qyzmetınıŋ ışınde paidalanuǧa arnalǧan materialdar bolǧan. Aqparattyŋ bır bölıgı Germaniia basşylyǧyna arnalǧan brifingterdı daiyndauda qoldanylǧan.
Prokuraturanyŋ mälımetınşe, Hanning alǧan qūpiia aqparattyŋ bırın şeteldık arnaiy qyzmet ökılınıŋ tapsyrysy boiynşa taldamalyq material äzırleuge paidalanǧan. Alaida Germaniia prokuraturasy atalǧan şeteldık memlekettıŋ atauyn jariialaǧan joq. Būl materialdyŋ tapsyrys beruşıge berılgen-berılmegenı äzırge anyqtalmaǧan.
Sonymen qatar tergeu barysynda Hanningtıŋ basqa memlekettıŋ arnaiy qyzmet ökılımen bailanysta bolǧany anyqtalǧany aityldy. Prokuraturanyŋ nūsqasy boiynşa, būrynǧy barlau qyzmetınıŋ basşysy bırneşe jyl boiy oǧan saiasi sipattaǧy aqparat bergen. Onyŋ bır bölıgı Manfred D.-dan alynǧan materialdarǧa negızdelgen.
Qazır ıs boiynşa tergeu jalǧasyp jatyr. Küdıktılerdıŋ äreketıne qūqyqtyq baǧa tergeu nätijesı boiynşa berılmek.
