قىتايدىڭ تاكلا-ماكان ءشولىنىڭ سولتۇستىك بولىگىندە اسا تەرەڭ ۇڭعىمانى بۇرعىلاۋ جۇمىستارى اياقتالدى. بۇل تۋرالى CGTN ارناسى ايتتى، دەپ حابارلايدى «ادىرنا» ءتىلشىسى.
ەلدىڭ سولتۇستىك-باتىسىنداعى شىڭجاڭ-ۇيعىر اۆتونوميالىق اۋدانىنداعى ۆەنسۋ ۋەزىندە ورنالاسقان «چجەنتان-1» ۇڭعىماسى 2 قازاندا 8345 مەتر تەرەڭدىككە جەتكەن.
CGTN مالىمەتىنشە، بۇل – قىتايدا جاسالعان 12 مىڭ مەترلىك العاشقى وتاندىق بۇرعىلاۋ قوندىرعىسىنىڭ كومەگىمەن قازىلعان ەكىنشى اسا تەرەڭ ۇڭعىما.
ۇڭعىما تارىم ويپاتىنىڭ سولتۇستىك-باتىسىنداعى تەرەڭ قاباتتاردا ورنالاسقان ءىرى قۇرىلىمدىق تۇزاقتاردىڭ مۇناي-گاز الەۋەتىن زەرتتەۋگە ارنالعان. اسىرەسە سين كەزەڭىنە جاتاتىن گەولوگيالىق قۇرىلىمداردى زەردەلەۋ جانە مۇناي مەن گاز قورلارىن ۇلعايتۋعا مۇمكىندىك بەرەتىن جاڭا اۋماقتاردى انىقتاۋ كوزدەلگەن.
12 مىڭ مەتر تەرەڭدىككە ارنالعان بۇرعىلاۋ قوندىرعىسى بيىكتىگى 82 مەتر بولاتىن بولات مۇنارامەن جابدىقتالعان. ول 665 تونناعا دەيىنگى جۇكتەمەگە توتەپ بەرە الادى. وسى تەحنولوگيانىڭ ارقاسىندا قىتاي ەندى 10 مىڭ مەتردەن استام تەرەڭدىكتەگى ۇڭعىمالاردى بۇرعىلاۋ ءۇشىن شەتەلدىك قوندىرعىلارعا تاۋەلدى بولمايدى.
بۇل – اتالعان قوندىرعىنىڭ ەكىنشى رەت ءساتتى قولدانىلۋى. قۋاتى 6000 ات كۇشىنە تەڭ، قىتايداعى ەڭ قۋاتتى بۇرعىلاۋ شىعىرشىعىمەن جانە 900 توننا جۇك كوتەرەتىن كوتەرگىش جۇيەمەن جابدىقتالعان كەشەن ەكى جوعارى جىلدامدىقتى پويىزدىڭ سالماعىنا تەڭ جۇكتى كوتەرە الادى. ال ينتەللەكتۋالدى باسقارۋ جۇيەسى بۇرعىلاۋ ۇدەرىسىن تولىق اۆتوماتتاندىرۋعا مۇمكىندىك بەرەدى.
قازىرگى ۋاقىتتا تارىم مۇناي كەن ورنىندا تەرەڭدىگى 8000 مەتردەن اساتىن 270-تەن استام ۇڭعىما بۇرعىلانعان. بۇل – قىتايداعى وسىنداي ۇڭعىمالاردىڭ جالپى سانىنىڭ جارتىسىنان كوبى. ال 2025 جىلى مۇندا ەل تاريحىنداعى العاشقى 10 مىڭ مەتردەن اساتىن «شەنديتاكە-1» ۇڭعىماسىن بۇرعىلاۋ اياقتالعان بولاتىن.
