الماتى سوتى بۇرىنعى ءدىني قىزمەتكەر ياكوۆ ۆورونتسوۆقا قاتىستى قىلمىستىق ءىس بويىنشا ۇكىم شىعاردى، دەپ حابارلايدى «ادىرنا» ءتىلشىسى.
ءىستى الماتى قالاسى مەدەۋ اۋداندىق №2 سوتى قارادى. سوت پروتسەسى 16 قىركۇيەكتە باستالىپ، جابىق فورماتتا ءوتتى.
ايىپتاۋ نۇسقاسىنا سايكەس، ۆورونتسوۆتىڭ پاتەرىندە جۇرگىزىلگەن ءتىنتۋ بارىسىندا مەتكاتينوننىڭ انالوگى سانالاتىن 3-CMC زاتىنىڭ 2,44 گرامى تابىلعان. بۇل كولەم اسا ءىرى مولشەر رەتىندە باعالانعان. ۆورونتسوۆ ءىس بويى ءوز كىناسىن مويىنداماي، زاتتىڭ وزىنە ادەيى تاستالعانىن مالىمدەدى.
دەسە دە، سوت ونىڭ كىناسى كۋاگەرلەردىڭ ايعاقتارىمەن، ساراپتاما قورىتىندىلارىمەن، ءتىنتۋ حاتتاماسىمەن جانە ءىس ماتەريالدارىنداعى وزگە دە دالەلدەرمەن راستالعانىن حابارلادى.
سۋديا جاسۇلان قۇساينوۆ باستاپقىدا وعان ورتاشا قاۋىپسىزدىك مەكەمەسىندە التى جىل باس بوستاندىعىنان ايىرۋ جازاسىن تاعايىنداعان. الايدا كەيىن جاڭا كونستيتۋتسيانىڭ قابىلدانۋىنا بايلانىستى راقىمشىلىق تۋرالى زاڭ قولدانىلىپ، جازا مەرزىمى ۇشتەن بىرىنە قىسقارتىلدى. ناتيجەسىندە ۆورونتسوۆ ءتورت جىلعا سوتتالدى.
ۇكىم ازىرگە زاڭدى كۇشىنە ەنگەن جوق.
ەسكە سالايىق، ياكوۆ ۆورونتسوۆ 2026 جىلعى 13 اقپاندا ۇستالدى. پوليتسيا قىزمەتكەرلەرى مەن ارنايى بولىمشە وكىلدەرى قىزمەتتىك يتتەردىڭ قاتىسۋىمەن ونىڭ پاتەرىنە ءتىنتۋ جۇرگىزىپ، ۇنتاق ءتارىزدى زات تاپقانىن حابارلاعان. سول كۇنى جۇرگىزىلگەن مەديتسينالىق كۋالاندىرۋ ناتيجەسىندە ونىڭ ەسىرتكى قولدانعانى انىقتالعانى ايتىلىپ، اكىمشىلىك سوت وعان 10 تاۋلىككە قاماۋ جازاسىن تاعايىندادى.
اكىمشىلىك قاماۋ مەرزىمى اياقتالعاننان كەيىن ۆورونتسوۆ بوستاندىققا شىققان جوق. 23 اقپاندا ول قىلمىستىق ءىس اياسىندا قايتادان جاۋاپقا تارتىلىپ، 25 اقپاندا سوت ونى قاماۋعا الۋ تۋرالى سانكتسيا بەردى. باستاپقىدا وعان ەسىرتكىنى وتكىزۋ ماقساتىنسىز ساقتاۋ ايىبىمەن قاتار، ەسىرتكى پريتونىن ۇيىمداستىرۋ ايىبى دا تاعىلعان بولاتىن. كەيىن سوتقا جولدانعان ايىپتاۋ اكتىسىنەن بۇل باپ الىنىپ تاستالدى. ونىڭ سەبەپتەرى جونىندە پروكۋراتۋرا رەسمي تۇسىنىكتەمە بەرگەن جوق.
