Almaty soty būrynǧy dıni qyzmetker İakov Voronsovqa qatysty qylmystyq ıs boiynşa ükım şyǧardy, dep habarlaidy «Adyrna» tılşısı.
Istı Almaty qalasy Medeu audandyq №2 soty qarady. Sot prosesı 16 qyrküiekte bastalyp, jabyq formatta öttı.
Aiyptau nūsqasyna säikes, Voronsovtyŋ päterınde jürgızılgen tıntu barysynda metkatinonnyŋ analogy sanalatyn 3-CMC zatynyŋ 2,44 gramy tabylǧan. Būl kölem asa ırı mölşer retınde baǧalanǧan. Voronsov ıs boiy öz kınäsın moiyndamai, zattyŋ özıne ädeiı tastalǧanyn mälımdedı.
Dese de, sot onyŋ kınäsı kuägerlerdıŋ aiǧaqtarymen, saraptama qorytyndylarymen, tıntu hattamasymen jäne ıs materialdaryndaǧy özge de däleldermen rastalǧanyn habarlady.
Sudia Jasūlan Qūsainov bastapqyda oǧan ortaşa qauıpsızdık mekemesınde alty jyl bas bostandyǧynan aiyru jazasyn taǧaiyndaǧan. Alaida keiın jaŋa Konstitusiianyŋ qabyldanuyna bailanysty raqymşylyq turaly zaŋ qoldanylyp, jaza merzımı üşten bırıne qysqartyldy. Nätijesınde Voronsov tört jylǧa sottaldy.
Ükım äzırge zaŋdy küşıne engen joq.
Eske salaiyq, İakov Voronsov 2026 jylǧy 13 aqpanda ūstaldy. Polisiia qyzmetkerlerı men arnaiy bölımşe ökılderı qyzmettık itterdıŋ qatysuymen onyŋ päterıne tıntu jürgızıp, ūntaq tärızdı zat tapqanyn habarlaǧan. Sol künı jürgızılgen medisinalyq kuälandyru nätijesınde onyŋ esırtkı qoldanǧany anyqtalǧany aitylyp, äkımşılık sot oǧan 10 täulıkke qamau jazasyn taǧaiyndady.
Äkımşılık qamau merzımı aiaqtalǧannan keiın Voronsov bostandyqqa şyqqan joq. 23 aqpanda ol qylmystyq ıs aiasynda qaitadan jauapqa tartylyp, 25 aqpanda sot ony qamauǧa alu turaly sanksiia berdı. Bastapqyda oǧan esırtkını ötkızu maqsatynsyz saqtau aiybymen qatar, esırtkı pritonyn ūiymdastyru aiyby da taǧylǧan bolatyn. Keiın sotqa joldanǧan aiyptau aktısınen būl bap alynyp tastaldy. Onyŋ sebepterı jönınde prokuratura resmi tüsınıkteme bergen joq.
