نيۋ-يورك پروكۋراتۋراسى اقش قاماۋىنا الىنعان ۆەنەسۋەلانىڭ بۇرىنعى پرەزيدەنتى نيكولاس مادۋرو مەن ونىڭ جۇبايى سيليا فلورەسكە قاتىستى جاڭا ايىپتار تاعۋعا دايىندالىپ جاتىر. بۇل تۋرالى CNN تەلەارناسى مالىمەت تاراتتى، دەپ حابارلايدى «ادىرنا» ءتىلشىسى.
دەرەككوزدەردىڭ مالىمەتىنشە، رەسمي اقپارات 8 قازاندا جاريالانۋى ىقتيمال.
مادۋرو بيلىگى كەزىندە ۆەنەسۋەلادا وننان استام امەريكالىق ازامات زاڭسىز قاماۋدا ۇستالعان. ولار وزدەرىنە جاسالعان ازاپتاۋلار تۋرالى ايتقان. اتاپ ايتقاندا، 2022 جىلدىڭ قازانىندا تۇتقىندار الماسۋى ناتيجەسىندە بوساتىلعان مەتتيۋ حيت پەن وسمان حان ءوز تالاپ-ارىزدارىندا سۋ مەن ەلەكتر توگى ارقىلى ازاپتالعاندارىن، جىنىستىق زورلىق-زومبىلىقپەن قورقىتىلعاندارىن، پسيحواكتيۆتى زاتتار بەرىلگەنىن جانە جالعىز كامەرادا ۇستالعاندارىن مالىمدەگەن. سونىمەن قاتار اقش تەڭىز جاياۋ اسكەرى ارداگەرى مەتتيۋ حيت قاماۋدا بولعان كەزدە وزىنە قول جۇمساۋعا ارەكەتتەنگەن.
2026 جىلدىڭ باسىندا اقش اسكەري وپەراتسيا جۇرگىزىپ، نيكولاس مادۋرو مەن ونىڭ جۇبايىن ۆەنەسۋەلادان الىپ كەتكەن بولاتىن. وپەراتسياعا مادۋرونىڭ اقش-تا ىزدەۋدە جۇرگەنى جانە وعان ەسىرتكىنىڭ زاڭسىز اينالىمىنا قاتىستى ايىپ تاعىلعانى نەگىز بولعان.
مادۋرو مەن فلورەستىڭ سوتى 2027 جىلعى 1 ماۋسىمدا وتەدى. ەگەر القابيلەر ولاردى اقش-قا كوكاين جەتكىزۋ ماقساتىنداعى قاستاندىققا قاتىسى بار دەپ تانىسا، ەكەۋىنە دە ءومىر بويىنا باس بوستاندىعىنان ايىرۋ جازاسى تاعايىندالۋى مۇمكىن.
