عالىمدار جاسىل ءتۇستى جۇلدىزدى تاپتى

فوتو: Reuters

عالىمدار العاش رەت جاسىل تۇسپەن كورىنەتىن اق ەرگەجەيلى جۇلدىزدى انىقتادى، دەپ حابارلايدى “ادىرنا” ءتىلشىسى. 

Reuters دەرەگىنشە، ول جەردەن 280 جارىق جىلى قاشىقتىقتا ورنالاسقان.

اق ەرگەجەيلىلەر – يادرولىق وتىنى تاۋسىلىپ، سىرتقى قاباتتارىن جوعالتقان جۇلدىزداردىڭ قالدىعى. ولاردىڭ كولەمى جەرمەن شامالاس بولعانىمەن، ماسساسى كۇن ماسساسىنىڭ جارتىسىنا جۋىق.

ۇلىبريتانياداعى ۋوريك ۋنيۆەرسيتەتىنىڭ عالىمدارى اق ەرگەجەيلىلەردىڭ جارىعى ادام كوزىنە قانداي تۇسپەن كورىنەتىنىن زەرتتەگەن. زەرتتەۋ ناتيجەلەرى 15 قازاندا RAS Techniques and Instruments عىلىمي جۋرنالىندا جاريالاندى.
ادەتتە جۇلدىزداردىڭ ءتۇسى ولاردىڭ تەمپەراتۋراسىنا بايلانىستى بولادى. سالقىنداۋ جۇلدىزدار قىزعىلت سارى، كۇن ءتارىزدى جۇلدىزدار اق، ال وتە ىستىق جۇلدىزدار كوگىلدىر بولىپ كورىنەدى. الايدا اق ەرگەجەيلىلەردىڭ تىعىز اتموسفەراسىنداعى حيميالىق ەلەمەنتتەر ولاردىڭ تۇسىنە اسەر ەتۋى مۇمكىن.

WD J1330+6435 دەپ اتالاتىن جۇلدىزدىڭ اتموسفەراسىنا بۇرىنعى پلانەتالىق جۇيەسىنەن قالعان تاستى بولشەكتەر تۇسكەن. سونىڭ ناتيجەسىندە ونىڭ اتموسفەراسىندا كالتسي، ليتي جانە ناتري مولشەرى ارتقان.

ءتۇرلى قۇبىلىستاردىڭ ناتيجەسىندە جۇلدىز سارعىش-جاسىل تۇسپەن كورىنەدى.

«پلانەتانىڭ بەتىندە تۇرىپ، جاسىل جۇلدىزعا قاراپ تۇرعانىڭىزدى ەلەستەتىپ كورىڭىز. بۇل عىلىمي فانتاستيكاداعى كورىنىسكە ۇقسايدى»، – دەدى زەرتتەۋ جەتەكشىسى، استروفيزيك مارك حوللاندس.