اقش پرەزيدەنتى دونالد ترامپ ۋكرايناعا قاتىستى كەلىسىمگە قول جەتكىزۋ ءۇشىن ۆلاديمير زەلەنسكي مەن ۆلاديمير ءپۋتيننىڭ كەزدەسۋى مىندەتتى ەمەس دەپ سانايدى. بۇل تۋرالى امەريكا كوشباسشىسى جۋرناليستەرگە بەرگەن سۇحباتىندا مالىمدەدى، دەپ حابارلايدى «ادىرنا» ءتىلشىسى.
سۇحباتتى اق ءۇي تىكەلەي ەفيردە كورسەتتى.
«ولاردىڭ ءبىر بولمەدە وتىرۋى مىندەتتى ەمەس. مەنىڭ ويىمشا، ولار كەلىسىمگە باسقا جولمەن دە كەلە الادى. ولارعا ءبىر بولمەدە بىرگە بولۋ قيىن. مۇنىڭ قالاي جۇزەگە اساتىنى مەنى قىزىقتىرمايدى»، – دەدى ترامپ ءجۋرناليستىڭ سۇراعىنا جاۋاپ بەرە وتىرىپ.
اق ءۇي باسشىسى ونداعان مىڭ ساربازدىڭ قازا تاپقانى تۋرالى حابارلاردى ەندى كورگىسى كەلمەيتىنىن دە ايتتى.
ەسكە سالايىق، بۇعان دەيىن دونالد ترامپ ۆلاديمير زەلەنسكيدى قاتاڭ سىنعا الىپ، ۋكراينا كەلىسىم جاساي الاتىن جاڭا كوشباسشى تابۋى كەرەك ەكەنىن مالىمدەگەن بولاتىن. ال ۋكراينا پرەزيدەنتى ۆلاديمير زەلەنسكي Bloomberg اگەنتتىگىنە بەرگەن سۇحباتىندا ترامپتىڭ ساياساتى كيەۆتى كاپيتۋلياتسياعا، ياعني قارسى تاراپتىڭ شارتتارىن قابىلداپ، بەرىلۋگە يتەرمەلەپ وتىرعانىن جەتكىزگەن.
جاقىندا بۇقارالىق اقپارات قۇرالدارىندا اقش پرەزيدەنتى مەن ونىڭ كومانداسى ۋكرايناعا رەسەيدىڭ شارتتارىنا ساي بەيبىت كەلىسىم جاساتۋعا تىرىساتىنى تۋرالى اقپارات تاراعان ەدى. ءوز كەزەگىندە اقش مەملەكەتتىك حاتشىسى ماركو رۋبيو جۋىردا كيەۆ پەن ماسكەۋ اراسىنداعى قاقتىعىستى بەيبىت جولمەن رەتتەۋ ماسەلەسىنە قاتىستى اقش پەن ۋكراينا قارىم-قاتىناسى تۋرالى پىكىر بىلدىرگەن. ونىڭ ايتۋىنشا، دونالد ترامپ ۋكراينا ۇستانىمىنا جاي عانا كوڭىلى تولماي وتىرعان جوق، ول بۇل جاعدايعا اشۋلى.
ال ۋكراينا پرەزيدەنتى ۆلاديمير زەلەنسكي ۋكراينا، اقش جانە رەسەي باسشىلارىنىڭ ۇشجاقتى كەزدەسۋى ءوتۋى مۇمكىن ەكەنىن مالىمدەگەن.
