اتىراۋ وبلىسىندا بۇرىنعى كۇيەۋى ءتورت تۋىسىن ولتىرگەن اقبايان مۇقانعاليەۆا جاعدايى تۋرالى العاش رەت سۇحبات بەردى، دەپ حابارلايدى “ادىرنا” ۇلتتىق پورتالى.
كتك تەلەارناسىنىڭ حابارلاۋىنشا، قازىر ول پسيحولوگيالىق وڭالتۋدان ءوتىپ، بالالارىن ءوز قامقورلىعىنا الۋدى ماقسات ەتىپ وتىر.
اقبايان مۇقانعاليەۆا اتا-اناسىنان، باۋىرى مەن قارىنداسىنان ايىرىلعان. الايدا ول ءالى كۇنگە دەيىن جاقىندارىنىڭ قازا تاپقانىن بىلمەيدى. تۋىستارى مامانداردىڭ كەڭەسىنە سۇيەنىپ، ازىرگە وعان قايعىلى جاعدايدىڭ ءمان-جايىن ايتپاۋدى ءجون كورگەن.
«ماماندار وعان شىندىقتى ەستۋگە ءالى دايىن ەمەس ەكەنىن ايتتى. قازىر بار ويىمىز – ونىڭ اياعىنان تۇرىپ كەتۋىنە كومەكتەسۋ»، – دەيدى تۋىسى ءاسيلا مۇقانعاليەۆا.
تۋىستارىنىڭ ايتۋىنشا، بەسىنشى بالاسىن اۋىر بوسانعاننان كەيىن اقبايانعا وتا جاسالىپ، ءومىرىنىڭ بەلگىلى ءبىر كەزەڭى ەسىنەن وشكەن. قازىر ول بالالارىن تانيدى، ولاردىڭ ەسىمدەرى مەن تۋعان كۇندەرىن ەسىندە ساقتاعان. ايەل بالالارىن اپتا سايىن بارىپ كورەدى.
ەسكە سالايىق، اقباياننىڭ بۇرىنعى كۇيەۋى سۇلتان سارسەماليەۆ ونىڭ اتا-اناسىن، باۋىرى مەن قارىنداسىن ولتىرگەننەن كەيىن ايەلدى وزىمەن بىرگە يندونەزياعا الىپ كەتكەن. العاشىندا اقباياننىڭ ءوزى دە كۇدىككە ىلىنگەن. الايدا پسيحياتريالىق ساراپتاما ناتيجەسىندە ونىڭ اۋىر پسيحولوگيالىق جاعدايدا بولعانى انىقتالىپ، كۇدىك ودان الىنىپ تاستالعان.
