فوتو: depositphotos.com
قازاقستان پرەزيدەنتى قاسىم-جومارت توقاەۆ تۇركى مەملەكەتتەرى ۇيىمىنىڭ 13-سامميتىندە يەمەندەگى حۋسيتتەر قوزعالىسىنىڭ ساۋد ارابياسىنا جاساعان شابۋىلدارىن ايىپتاپ، مۇنداي ارەكەتتەردى توقتاتۋعا شاقىردى. بۇل تۋرالى «ادىرنا» اقورداعا سىلتەمە جاساپ حابارلايدى.
مەملەكەت باسشىسى سوزىندە تۇركى مەملەكەتتەرى ۇيىمى اللەياسىنىڭ اشىلۋىنا دا توقتالدى. اتالعان باستاما تۇركيا پرەزيدەنتى رەجەپ تايپ ەردوعاننىڭ ۇسىنىسىمەن جۇزەگە اسقان. توقاەۆ بۇل نىسان باۋىرلاس ەلدەر اراسىنداعى ىنتىماقتاستىق پەن بىرلىكتىڭ سيمۆولىنا اينالاتىنىنا سەنىم ءبىلدىردى.
پرەزيدەنتتىڭ ايتۋىنشا، تاياۋ شىعىستاعى گەوساياسي جاعدايدىڭ شيەلەنىسۋى، اسىرەسە ورمۋز بۇعازى ماڭىنداعى احۋالدىڭ كۇردەلەنۋى حالىقارالىق ساۋدا مەن كولىك-لوگيستيكا بايلانىستارىنا كەرى اسەرىن تيگىزىپ وتىر. ونىڭ سوزىنشە، بۇل جاعداي شەكارالاس تۇركى مەملەكەتتەرىنىڭ ەكونوميكالىق ىنتىماقتاستىعىنا دا ىقپال ەتەدى.
«قازاقستان باۋىرلاس ساۋد ارابياسىنا قارسى حۋسيتتەر اسكەري قوزعالىسىنىڭ نەگىزسىز شابۋىلدارىن ايىپتادى. وسىنداي ءجونسىز ارەكەتتەردى توقتاتۋ قاجەت دەگەن مالىمدەمەلەردى قولدايمىز»، – دەدى قاسىم-جومارت توقاەۆ.
ايتا كەتەيىك، «انسار اللا» قوزعالىسى، ياعني حۋسيتتەر – يەمەن اۋماعىندا ارەكەت ەتەتىن قارۋلى-ساياسي توپ. قوزعالىس ساۋد ارابياسى قولدايتىن ۇكىمەتتىك كۇشتەرمەن ۇزاق ۋاقىتتان بەرى قاقتىعىسىپ كەلەدى. حۋسيتتەرگە يران قولداۋ كورسەتەدى.
مالىمەتكە سايكەس، تاراپتار اراسىنداعى اسكەري تەكەتىرەس ءتورت جىلعا سوزىلعان ۇزىلىستەن كەيىن شىلدە ايىنىڭ ورتاسىندا قايتا كۇشەيگەن. وسى كەزەڭدە حۋسيتتەر قىزىل تەڭىزدىڭ باتىس جاعالاۋىنداعى جانە قىزىل تەڭىزدى ادەن شىعاناعىمەن جالعايتىن ستراتەگيالىق ماڭىزى بار باب-ەل-ماندەب بۇعازى ماڭىنداعى بىرقاتار ەلدى مەكەندى باقىلاۋىنا العان.
28 قازاندا قوزعالىس وكىلدەرى ساۋد ارابياسىنا بىرنەشە باعىت بويىنشا سوققى جاساعانىن مالىمدەدى. ولاردىڭ ايتۋىنشا، ەلدىڭ وڭتۇستىگىندەگى اۋە بازالارىندا ورنالاسقان اسكەري-كولىك ۇشاقتارى مەن قورعانىس مينيسترلىگى عيماراتى زىمىرانمەن اتقىلانعان. سونىمەن قاتار ساۋد ارابياسىنىڭ شىعىسىنداعى راس-تاننۋرا مۇناي وڭدەۋ زاۋىتىنا دا شابۋىل جاسالعانى حابارلانعان.
