اقش پرەزيدەنتى دونالد ترامپ ۋكراينا باسشىسى ۆلاديمير زەلەنسكيدى مايامي قالاسىندا وتەتىن «ۇلكەن جيىرمالىق» (G20) سامميتىنە شاقىرۋعا دايىن ەكەنىن مالىمدەدى. بۇل تۋرالى اق ءۇي باسشىسى 31 قازاندا جۋرناليستەردىڭ سۇراعىنا جاۋاپ بەرۋ كەزىندە ايتتى, دەپ حابارلايدى “ادىرنا”.
مەملەكەت جانە ۇكىمەت باسشىلارىنىڭ باسقوسۋى 14–15 جەلتوقسان كۇندەرى فلوريدا شتاتىنداعى مايامي قالاسىندا وتەدى. ترامپتىڭ سوزىنشە، زەلەنسكيدى سامميتكە شاقىرۋعا ەشقانداي كەدەرگى جوق.
بۇعان دەيىن اقش مەملەكەتتىك حاتشىسى ماركو رۋبيو دا ۋكراينا پرەزيدەنتىنىڭ كەزدەسۋگە قاتىسۋ مۇمكىندىگىن جوققا شىعارماعان بولاتىن. ونىڭ ايتۋىنشا، ەگەر دونالد ترامپ ۋكراينا وكىلىنىڭ سامميتكە قاتىسۋى وڭ ناتيجە بەرەدى دەپ ەسەپتەسە، ءتيىستى شاقىرتۋ جىبەرىلۋى مۇمكىن.
ايتا كەتەيىك، ۆاشينگتون قىركۇيەك ايىندا رەسەي پرەزيدەنتى ۆلاديمير ءپۋتيندى دە G20 سامميتىنە شاقىرعان. سول كەزدە ماركو رۋبيو حالىقارالىق ماسەلەلەردى شەشۋ ءۇشىن كەلىسپەۋشىلىگى بار تاراپتاردىڭ دا كەزدەسۋى ماڭىزدى ەكەنىن اتاپ وتكەن ەدى.
الايدا اقش كونگرەسىنىڭ دەموكراتيالىق جانە رەسپۋبليكالىق پارتيالارىنان قۇرالعان بىرقاتار سەناتور ترامپ اكىمشىلىگىن پۋتينگە جولدانعان شاقىرتۋدى كەرى قايتارىپ الۋعا ۇندەدى. ولار رەسەي باسشىلىعىن ۋكرايناداعى سوعىستىڭ باستالۋىنا جاۋاپتى دەپ سانايدى. قازىرگى ۋاقىتتا ءپۋتيننىڭ سامميتكە قاتىسۋ-قاتىسپاۋى بەلگىسىز.
ال ۆلاديمير زەلەنسكي قىركۇيەك ايىنىڭ سوڭىندا DW باسىلىمىنا بەرگەن سۇحباتىندا پۋتين دە شاقىرىلعان جاعدايدا ماياميگە بارۋعا دايىن ەكەنىن ايتقان بولاتىن. ۋكراينا پرەزيدەنتى ەكى ەل باسشىسىنىڭ كەزدەسىپ، كەلىسسوز جۇرگىزۋى قاجەت ەكەنىن جەتكىزدى.
دەگەنمەن رەسەي پرەزيدەنتىنىڭ ءباسپاسوز حاتشىسى دميتري پەسكوۆ فلوريدادا مۇنداي كەزدەسۋدىڭ ءوتۋى مۇمكىن ەمەس ەكەنىن مالىمدەگەن. كرەمل بۇعان دەيىن دە ەكى ەل باسشىلارىنىڭ ىقتيمال كەلىسسوزدەرى ماسكەۋدە ءوتۋى كەرەگىن العا تارتقان.
قازان ايىنىڭ سوڭىندا ۋكراينا سىرتقى ىستەر ءمينيسترى اندرەي سيبيگا كيەۆتىڭ زەلەنسكي مەن ءپۋتيننىڭ كەزدەسۋىنە دايىن ەكەنىن حابارلادى. ونىڭ ايتۋىنشا، كەزدەسۋ ماسكەۋ، بەلارۋس نەمەسە سولتۇستىك كورەيا اۋماعىنان باسقا كەز كەلگەن جەردە ۇيىمداستىرىلۋى مۇمكىن.
ايتا كەتسەك، مايامي قالاسىندا وتەتىن سامميتكە قازاقستان پرەزيدەنتى قاسىم-جومارت توقاەۆ تا اقش پرەزيدەنتى دونالد ترامپتىڭ شاقىرۋىمەن بارادى.
سامميتكە دايىندىق ماسەلەلەرى سىرتقى ىستەر ءمينيسترى ەرمەك كوشەرباەۆ پەن اقش مەملەكەتتىك حاتشىسىنىڭ وڭتۇستىك جانە ورتالىق ازيا ىستەرى جونىندەگى كومەكشىسى پول كاپۋردىڭ كەزدەسۋىندە تالقىلانعان بولاتىن.
