AQŞ prezidentı Donald Tramp Ukraina basşysy Vladimir Zelenskiidı Maiami qalasynda ötetın «Ülken jiyrmalyq» (G20) sammitıne şaqyruǧa daiyn ekenın mälımdedı. Būl turaly Aq üi basşysy 31 qazanda jurnalisterdıŋ sūraǧyna jauap beru kezınde aitty, dep habarlaidy “Adyrna”.
Memleket jäne ükımet basşylarynyŋ basqosuy 14–15 jeltoqsan künderı Florida ştatyndaǧy Maiami qalasynda ötedı. Tramptyŋ sözınşe, Zelenskiidı sammitke şaqyruǧa eşqandai kedergı joq.
Būǧan deiın AQŞ memlekettık hatşysy Marko Rubio da Ukraina prezidentınıŋ kezdesuge qatysu mümkındıgın joqqa şyǧarmaǧan bolatyn. Onyŋ aituynşa, eger Donald Tramp Ukraina ökılınıŋ sammitke qatysuy oŋ nätije beredı dep eseptese, tiıstı şaqyrtu jıberıluı mümkın.
Aita keteiık, Vaşington qyrküiek aiynda Resei prezidentı Vladimir Putindı de G20 sammitıne şaqyrǧan. Sol kezde Marko Rubio halyqaralyq mäselelerdı şeşu üşın kelıspeuşılıgı bar taraptardyŋ da kezdesuı maŋyzdy ekenın atap ötken edı.
Alaida AQŞ Kongresınıŋ Demokratiialyq jäne Respublikalyq partiialarynan qūralǧan bırqatar senator Tramp äkımşılıgın Putinge joldanǧan şaqyrtudy kerı qaitaryp aluǧa ündedı. Olar Resei basşylyǧyn Ukrainadaǧy soǧystyŋ bastaluyna jauapty dep sanaidy. Qazırgı uaqytta Putinnıŋ sammitke qatysu-qatyspauy belgısız.
Al Vladimir Zelenskii qyrküiek aiynyŋ soŋynda DW basylymyna bergen sūhbatynda Putin de şaqyrylǧan jaǧdaida Maiamige baruǧa daiyn ekenın aitqan bolatyn. Ukraina prezidentı ekı el basşysynyŋ kezdesıp, kelıssöz jürgızuı qajet ekenın jetkızdı.
Degenmen Resei prezidentınıŋ baspasöz hatşysy Dmitrii Peskov Floridada mūndai kezdesudıŋ ötuı mümkın emes ekenın mälımdegen. Kreml būǧan deiın de ekı el basşylarynyŋ yqtimal kelıssözderı Mäskeude ötuı keregın alǧa tartqan.
Qazan aiynyŋ soŋynda Ukraina syrtqy ıster ministrı Andrei Sibiga Kievtıŋ Zelenskii men Putinnıŋ kezdesuıne daiyn ekenın habarlady. Onyŋ aituynşa, kezdesu Mäskeu, Belarus nemese Soltüstık Koreia aumaǧynan basqa kez kelgen jerde ūiymdastyryluy mümkın.
Aita ketsek, Maiami qalasynda ötetın sammitke Qazaqstan prezidentı Qasym-Jomart Toqaev ta AQŞ prezidentı Donald Tramptyŋ şaqyruymen barady.
Sammitke daiyndyq mäselelerı Syrtqy ıster ministrı Ermek Köşerbaev pen AQŞ Memlekettık hatşysynyŋ Oŋtüstık jäne Ortalyq Aziia ısterı jönındegı kömekşısı Pol Kapurdyŋ kezdesuınde talqylanǧan bolatyn.
