فوتو: aircenter.az
ازەربايجاننان ەۋروپاعا گاز تاسىمالدايتىن قۇبىر تولىق قۋاتىندا جۇمىس ىستەپ تۇر. جەتى ەلدىڭ اۋماعى ارقىلى ءوتىپ، يتالياعا دەيىن جالعاساتىن ماگيسترال بولگارياداعى ينتەركوننەكتورلار ارقىلى ەۋروپالىق وداقتىڭ ون مەملەكەتىنە گاز جەتكىزەدى. بۇل تۋرالى ازەربايجان پرەزيدەنتى يلحام اليەۆ مالىمدەدى، دەپ حابارلايدى “ادىرنا”.
مەملەكەت باسشىسى بۇل جونىندە 12 قاراشادا دۋبليندە وتكەن ەۋروپالىق ساياسي قوعامداستىقتىڭ توعىزىنشى ءسامميتى اياسىنداعى دوڭگەلەك ۇستەلدە ايتتى. جيىن «باسەكەگە قابىلەتتى ەۋروپانى قالىپتاستىرۋ – يننوۆاتسيالار، ءوزارا بايلانىس جانە قولجەتىمدى ەنەرگيا» تاقىرىبىنا ارنالدى.
يلحام اليەۆ گاز قۇبىرىنىڭ وتكىزۋ قابىلەتىن ودان ءارى ارتتىرۋ قاجەتتىگىن اتاپ ءوتتى. ونىڭ ايتۋىنشا، گرەكيا مەن يتالياعا باعىتتالعان گاز قۇبىرىنىڭ جىلدىق وتكىزۋ قۋاتى 10 ميلليارد تەكشە مەتردەن 11,2 ميلليارد تەكشە مەترگە دەيىن ۇلعايتىلعان.
سونىمەن قاتار ازەربايجان پرەزيدەنتى ەلدەگى وڭدەۋ كاسىپورىندارىنىڭ جالپى وندىرىستىك قۋاتى جىلىنا 30 ميلليون تونناعا جەتەتىنىن ايتتى.
يلحام اليەۆ الداعى ۋاقىتتا ەۋروپاعا گاز جەتكىزۋ كولەمىن ارتتىرۋ جوسپارلانىپ وتىرعانىن جەتكىزدى. وسى ماقساتتا جاڭا كەن ورىندارىن اشۋ جانە يگەرۋ جۇمىستارى جۇرگىزىلمەك.
