پرەزيدەنت قاسىم-جومارت توقاەۆ اۋىلعا جانى اشىمايتىن بيزنەسمەندەرگە قاتىستى شارا قابىلداۋدى ۇسىندى. بۇل تۋرالى ول بۇگىن اۋىل شارۋاشىلىعى ەڭبەككەرلەرىنىڭ ءۇشىنشى فورۋمىندا ايتتى، دەپ حابارلايدى "ادىرنا".
مەملەكەت باسشىسىنىڭ ايتۋىنشا، مەملەكەت تۋعان جەرىنىڭ وركەندەۋىنە ۇلەس قوساتىن، اۋىلداستارىنىڭ يگىلىگىن ويلايتىن ادال فەرمەرلەر مەن ىسكەر شارۋالارعا قولداۋ كورسەتە بەرەدى. بىراق، پرەزيدەنت جەردەن پايدا تاۋىپ جۇرگەنىمەن ۇلكەن قالادا نەمەسە شەتەلدە تۇراتىن بيزنەسمەندەر دە بار ەكەنىن ۇمىتپادى.
«ولار ءتىپتى وزدەرىنىڭ شارۋاشىلىقتارىنا بارمايدى، كوبىنە الەۋمەتتىك جاۋاپكەرشىلىك تانىتۋعا قۇلىقتى ەمەس، وتانداستارىنا جانى اشىمايدى، ادامداردىڭ مۇڭ-مۇقتاجىن تۇسىنە بەرمەيدى. وسى ورايدا زاڭدى ساۋال تۋادى. بىزگە جەر قادىرىن بىلمەيتىن، حالىقتان الىس، اۋىل شارۋاشىلىعىن تەك پايدا تابۋدىڭ جولى رەتىندە قاراستىراتىن ادامدار قاجەت پە؟ مەنىڭشە، جاۋابى انىق. قاجەت ەمەس. ەندەشە زاڭ جۇزىندە شارالار قابىلداۋ كەرەك»، - دەدى توقاەۆ.
ياعني، پرەزيدەنت اتاپ وتكەندەي، بۇل سالادا كاسىپپەن اينالىساتىنداردىڭ ءبارى، ەڭ الدىمەن، اۋىلداعى تۇرمىس ساپاسىن جاقسارتۋدى ويلاۋعا ءتيىس.
«اگرارلىق سەكتور – مەملەكەتىمىزدىڭ جاھاندىق باسەكەگە قابىلەتتىلىگىنە ىقپال ەتەتىن نەگىزگى فاكتورلاردىڭ ءبىرى. اسىرەسە، تۇراقسىز زاماندا ونىڭ وزەكتىلىگى ارتا ءتۇستى»، - دەدى پرەزيدەنت.
