تارازدا «ASPARA FASHION DAY 2026» حالىقارالىق ءسان ءىس-شاراسى ءوتىپ جاتىر

283
Adyrna.kz Telegram
https://www.adyrna.kz/storage/uploads/xUpMTxUUmPxjgZkJRLM7svgR692J21SEUOJbwzGo.jpg

بۇگىن، 21 قاراشادا، تاراز قالاسىنداعى «كونە تاراز» ەتنومادەني كەشەنىندە جامبىل وبلىسى اكىمدىگىنىڭ قولداۋىمەن «اسىل-ديزاين» ءسان ءۇيى ۇيىمداستىرعان «ASPARA FASHION DAY 2026 – مۇرا كودى» حالىقارالىق ءىس-شاراسى وتۋدە.

ءىس-شارا اياسىندا قولونەرشىلەر كورمەسى، كونتسەرت، حالىقارالىق فورۋم جانە ءباسپاسوز كونفەرەنتسياسى ۇيىمداستىرىلۋدا. باعدارلامانىڭ نەگىزگى ماقساتى – ۇلتتىق مادەني مۇرانى زاماناۋي ءسان ۇلگىلەرى ارقىلى دارىپتەۋ، وتاندىق ديزاينەرلەر مەن قولونەر شەبەرلەرىنىڭ شىعارماشىلىعىن ناسيحاتتاۋ جانە حالىقارالىق ىنتىماقتاستىقتى دامىتۋ.

كورمەگە جامبىل ءوڭىرىنىڭ 33 قولونەرشىسى قاتىسىپ، ۇلتتىق ناقىشتاعى اۆتورلىق بۇيىمدارىن تانىستىرۋدا. كەلۋشىلەرگە ءداستۇرلى قولونەر تۋىندىلارى، ۇلتتىق ويۋ-ورنەكتەرمەن بەزەندىرىلگەن بۇيىمدار مەن شەبەرلەردىڭ جەكە جۇمىستارى ۇسىنىلعان.

ال كونتسەرتتىك باعدارلامادا كەنەن ازىرباەۆ اتىنداعى جامبىل وبلىستىق فيلارمونياسىنىڭ ونەرپازدارى مەن ءوڭىردىڭ شىعارماشىلىق ۇجىمدارى ونەر كورسەتۋدە. باعدارلامادا حالىق اندەرى، تەرمە جانە تۋعان جەرگە ارنالعان ەسترادالىق شىعارمالار ورىندالۋدا.

سونىمەن قاتار، جامبىل وبلىستىق تاريحي-ولكەتانۋ مۋزەيىندە وتكەن حالىقارالىق فورۋمدا ۇلتتىق مۇرانى زاماناۋي ءسان ارقىلى دارىپتەۋ، كرەاتيۆتى يندۋستريالاردى دامىتۋ جانە ديزاينەرلەر مەن قولونەرشىلەر اراسىنداعى ىنتىماقتاستىق ماسەلەلەرى تالقىلاندى. كەزدەسۋگە جەرگىلىكتى اتقارۋشى ورگانداردىڭ، مادەنيەت جانە تۋريزم سالالارىنىڭ وكىلدەرى، تاريحشىلار مەن قازاقستاندىق جانە شەتەلدىك ديزاينەرلەر قاتىستى.

فورۋم بارىسىندا جامبىل وبلىسى اكىمىنىڭ ورىنباسارى سەرىك سالەموۆ وڭىردە كيىز باسۋ، توقىماشىلىق جانە زەرگەرلىك ونەر داستۇرلەرىنىڭ ساقتالعانىن اتاپ ءوتتى. ال «Kazakh Tourism» ۇلتتىق كومپانياسىنىڭ وكىلى اقبوتا قايىرحانوۆا ءىس-شارالاردىڭ قازاقستاننىڭ وقيعالىق كۇنتىزبەسىنە ەنگىزىلۋ ءتارتىبى مەن تۋريستىك الەۋەتتى ارتتىرۋداعى ماڭىزى تۋرالى باياندادى.

بيىلعى حالىقارالىق ءسان ءىس-شاراسىنا قازاقستان، قىرعىزستان، تاجىكستان، وزبەكستان جانە تۇرىكمەنستاننان 18 ديزاينەر قاتىسۋدا. ولار «مۇرا كودى» تاقىرىبىندا ازىرلەنگەن 21 اۆتورلىق توپتاماسىن ۇسىنادى. ءسان كورسەتىلىمىندە ۇلتتىق كيىم ۇلگىلەرى، ءداستۇرلى ويۋ-ورنەكتەر مەن تاريحي مادەني ەلەمەنتتەردىڭ زاماناۋي ساندەگى كورىنىسى تانىستىرىلادى.

ءسان كورسەتىلىمىنىڭ باعدارلاماسىندا قازاقستاندىق ديزاينەرلەرمەن قاتار، شەتەلدىك سانگەرلەردىڭ جۇمىستارى دا ۇسىنىلادى. سونىمەن بىرگە تاراز قالاسىنىڭ قولونەرشىلەرى مەن مودەلدىك اگەنتتىكتەرىنىڭ توپتامالارى دا پوديۋمعا شىعادى.

بۇگىن ساعات 17:00-دە «كونە تاراز» ەتنومادەني كەشەنىنىڭ كورمە پاۆيلونىندا حالىقارالىق ءسان كورسەتىلىمى باستالادى.

پىكىرلەر