جامبىل وبلىسىنىڭ اكىمى نۇرجان نۇرجىگىتوۆ «ساياسي رەفورما جاعدايىندا قازاقستان حالقى اسسامبلەياسىنىڭ جۇمىسىن جەتىلدىرۋدىڭ نەگىزگى باعىتتارى» تاقىرىبىندا وتكەن جامبىل وبلىستىق قازاقستان حالقى اسسامبلەياسىنىڭ XXV سەسسياسىنىڭ پلەنارلىق وتىرىسىنا قاتىستى.
ايماق باسشىسى ءوز سوزىندە سەسسيانىڭ مىندەتى – قحا-نى ودان ءارى دامىتۋ باعىتتارىن بەلگىلەۋ ەكەنىن اتاپ ءوتتى.
- ەلىمىز ءۇشىن تۇراقتىلىق پەن ەتنوسارالىق كەلىسىمدى قامتاماسىز ەتۋ – مەملەكەتتىك ساياساتتىڭ ماڭىزدى باسىمدىقتارىنىڭ ءبىرى. مەملەكەت باسشىسى قاسىم-جومارت توقاەۆ جاڭا ناقتى جاعدايدا قازاقستان حالقى اسسامبلەياسىنىڭ بەيبىتشىلىك پەن كەلىسىم ساياساتىمىزدىڭ بەرىك ينستيتۋتسيونالدىق تىرەگى بولىپ قالا بەرەتىنىن اتاپ ءوتتى. ەل پرەزيدەنتى قحا قىزمەتىنىڭ ءۇش نەگىزگى باسىمدىعىن ايقىنداپ بەرگەن بولاتىن. ولار: اسسامبلەيانىڭ ساياسي رەفورمالاردى ىسكە اسىرۋداعى ءرولىن ارتتىرۋ، قوعامدىق الەۋەتىن جانداندىرۋ، قۇقىق قورعاۋ قىزمەتىن كۇشەيتۋ جانە اقپاراتتىق جۇمىستى كۇشەيتۋ. ءبىزدىڭ وبلىستا دا وسى باعىتتار بويىنشا كەشەندى جۇمىستار جۇرگىزىلەتىن بولادى، - دەدى نۇرجان نۇرجىگىتوۆ.
ايماق باسشىسى شاعىن جانە ورتا بيزنەستەگى، ءبىلىم بەرۋ، دەنساۋلىق ساقتاۋ، مادەنيەت، سپورت سالالارىن دامىتۋعا ۇلەس قوسىپ جۇرگەن جامبىلدىقتاردىڭ، ءتۇرلى ەتنوس وكىلدەرىنىڭ جەتىستىكتەرىن جۇيەلى نەگىزدە كەڭىنەن جاريالاۋ قاجەت دەپ ەسەپتەيدى. وڭىرلىك قحا مۇشەلەرىن ينتەرنەت-كەڭىستىكتەگى جۇمىستاردى جانداندىرۋعا، حالىق اراسىندا اقپاراتتىق-ءتۇسىندىرۋ جۇمىستارىن جۇرگىزۋگە شاقىردى.
سونداي-اق، وبلىس اكىمى ازاماتتاردى قابىلداۋ، ولارعا قۇقىقتىق كومەك كورسەتۋ، «باتىرلار ءبىزدىڭ ارامىزدا» جوباسىن ىسكە اسىرۋ، ەتنوستار كۇندەرىن وتكىزۋ، مەدياتسيا ينستيتۋتىن دامىتۋ جانە دارىپتەۋ بويىنشا مىندەتتەر جۇكتەدى. ايتا كەتۋ كەرەك، بيىل وبلىستا قر اقپارات جانە قوعامدىق دامۋ مينيسترلىگىمەن بىرلەسىپ مەدياتورلاردى دايىنداۋ بويىنشا پيلوتتىق جوبا جۇزەگە اسىرىلدى.
– بىرلىك، تۇراقتىلىق – جاڭا قازاقستاندى قۇرۋداعى تابىسقا جەتۋدىڭ ماڭىزدى شارتتارى. ءبىز بۇعان بىرلەسىپ قانا قول جەتكىزەمىز. جالپىۇلتتىق رەفەرەندۋمدا كونستيتۋتسيالىق تۇزەتۋلەر مەن تولىقتىرۋلاردى حالىقتىڭ باسىم بولىگى قولداپ، داۋىس بەردى. ەندى بارشامىز كۇش بىرىكتىرە وتىرىپ، وسى قابىلدانعان وزگەرىستەردى جۇزەگە اسىرۋعا ءتيىسپىز، – دەپ تۇيىندەدى نۇرجان نۇرجىگىتوۆ.
سەسسيا بارىسىندا ايماق باسشىسى بەيبىتشىلىك پەن كەلىسىمدى نىعايتۋعا ەلەۋلى ۇلەس قوسىپ جۇرگەن بىرقاتار ەتنومادەني بىرلەستىكتەردىڭ وكىلدەرىن ماراپاتتادى. قازاقستان رەسپۋبليكاسى قحا مۇشەسى، «احىسكا» تۇرىك ەتنومادەني بىرلەستىگى توراعاسىنىڭ ورىنباسارى، وبلىستىق ءماسليحات دەپۋتاتى، مەتسەنات جاليل اببوسوۆ وڭىرلىك قحا توراعاسىنىڭ قوعامدىق ورىنباسارى بولىپ سايلاندى. قاتىسۋشىلار سەكتسيالىق تالقىلاۋلار كەزىندە ازىرلەنگەن قحا قىزمەتىن جەتىلدىرۋ جونىندەگى ۇسىنىستاردى ءبىراۋىزدان ماقۇلدادى.
بۇگىندە وبلىستا 75 ەتنو-مادەني بىرلەستىك،172 وبلىستىق قحا جانىنداعى قوعامدىق كەلىسىم كەڭەسى بار.
جىل باسىنان بەرى ەتنوسارالىق قاتىناستى نىعايتۋ ماقساتىندا 800-دەن استام ءىس-شارا ۇيىمداستىرىلعان.
