الماتىدا نۇرماعامبەتوۆتى قۇرمەتپەن ەسكە الۋ كۇنى ءوتتى

1333

وسىدان 5 جىل بۇرىن 2013 جىلعى 24 قىركۇيەكتە كەڭەس وداعىنىڭ باتىرى، حالىق قاھارمانى، قازاقستان رەسپۋبليكاسىنىڭ العاشقى قورعانىس ءمينيسترى، ارميا گەنەرالى ساعادات قوجاحمەتۇلى نۇرماعامبەتوۆ ومىردەن وزعان ەدى. بۇگىن تولەباەۆ پەن جامبىل قيىلىسىندا مەموريالدىق تاقتاعا گۇل شوقتارىن سالتاناتتى قويۋ ءراسىمى ءوتتى. حالىق قاھارمانى ساعادات نۇرماعامبەتوۆتى ەسكە الۋعا ونىڭ تۋىسقاندارى مەن دوستارى، قر قك ارداگەرلەرى مەن الماتى وڭىرلىك گارنيزونى اسكەري قىزمەتشىلەرى، الماتى قالاسى قورعانىس ىستەرى جونىندەگى دەپارتامەنتى باسشىلىعى قاتىستى.
حالىق قاھارمانى نۇرماعامبەتوۆ ساعادات قوجاحمەتۇلى، ۇلتى-قازاق، 1924 جىلى 25 مامىردا تسەلينوگراد وبلىسى الەكسەەۆ اۋدانىندا (قازىرگى اقمولا وبلىسى اقكول اۋدانىندا) دۇنيەگە كەلگەن.
1942 جىلى مەكتەپ  پارتاسىنان قىزىل ارميا قاتارىنا شاقىرىلىپ، تۇركىمەنستاننىڭ  كۋشكا قالاسىنداعى اسكەري ۋچيليششەگە جىبەرىلەدى. وقۋىن بىتىرگەن سوڭ 1943 جىلدىڭ ءساۋىر ايىنان  ۇلى وتان سوعىسىنىڭ  مايداندارىندا بولدى. 1945 جىلدىڭ مامىر ايىنا دەيىن پۋلەمەت ۆزۆودىنىڭ كومانديرى، پۋلەمەت روتاسىنىڭ كومانديرى، 5-ەكپىندى ارميانىڭ ءىى دارەجەلى سۋۆوروۆ وردەندى  301 دونەتسك بەرلين اتقىشتار ديۆيزياسىنىڭ  1052 اتقىشتار پولكى قۇرامىندا اتقىشتار باتالونىنىڭ كومانديرى لاۋازىمىندا سوعىسقان.
1991 جىلى 25 قازاندا قازاقستان رەسپۋبليكاسىنىڭ پرەزيدەنتىنىڭ جارلىعىمەن مەملەكەتتىك قورعانىس كوميتەتىنىڭ توراعاسى، ال 1992 جىلدىڭ مامىرىندا قر قورعانىس ءمينيسترى بولىپ تاعايىندالدى.
1995 جىلدىڭ قاراشا ايىندا ارميا گەنەرالى اتاعىمەن وتستاۆكاعا شىقتى.
ساعادات قوجاحمەتۇلى لەنين، 2 قىزىل جۇلدىز، 1,2- دارەجەلى وتان سوعىسى، قىزىل تۋ، "قۇرمەت بەلگىسى", وكتيابر رەۆوليۋتسياسى، "وتان" وردەندەرىمەن، مەدالدارمەن، شەتەلدەردىڭ وردەن، مەدالدارىمەن ماراپاتتالعان.
1994 جىلعى 23 مامىردا مەملەكەت باسشىسىنىڭ جارلىعىمەن ساعادات قوجاحمەتۇلى نۇرماعامبەتوۆكە حالىق قاھارمانى اتاعى مەن № 1 «التىن جۇلدىز» تابىس ەتىلگەن.
سونىمەن قاتار ۇكىمەت قاۋلىسىمەن استانا قالاسىنداعى «جاس ۇلان» مەكتەبىنە ارميا گەنەرالى ساعادات نۇرماعامبەتوۆتىڭ ەسىمى بەرىلگەن.
حالىق قاھارمانى ساعادات قوجاحمەتۇلى ەل ەسىندە ماڭگى ساقتالىپ، تاريحتا اتى قالا بەرمەك.

قارلىعاش مۇسابەكقىزى

پىكىرلەر