قاڭتار وقيعاسىندا كوزى كورمەي قالعان ەرمەك ابدىرەشوۆ كىناسىز دەپ تانىلدى

2011
Adyrna.kz Telegram
فوتو: azattyq.org
فوتو: azattyq.org

قاڭتاردا بولعان ميتينگكە قاتىسقان ەرمەك ابدىرەشوۆ كىناسىز دەپ تانىلدى. الماتى پروكۋراتۋراسى وعان قاتىستى قىلمىستىق قۋدالاۋدى توقتاتتى. بۇل تۋرالى Qantar قورى Instagram پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.

ايتا كەتەيىك، 37 جاستاعى ەرمەك ابدىرەشوۆ قاڭتار وقيعاسىنان كەيىن كوزى كورمەي قالعان. ءبىر كوزى ميتينگتىڭ قىزىپ تۇرعان شاعىندا كورمەي قالدى. ونىڭ  بەتىنە رەزەڭكە وق تيەدى. ەكىنشىسى — تەرگەۋ يزولياتورىنداعى ازاپتاۋدان كەيىن كورمەي قالعان.

“5 قاڭتار كۇنى ەرمەك الماتى قالاسىنداعى رەسپۋبليكا الاڭىندا وتكەن بەيبىت ميتينگكە شىقتى. دەمونسترانتتاردىڭ الدىندا جارىق شۋىلى بار گراناتالار جارىلدى جانە ولارعا تراۆماتيكالىق تاپانشالاردان وق جاۋدىردى. ەرمەك جانساقتاۋ بولىمىنە ءتۇستى. ءتورت كۇننەن كەيىن ونى فورما كيگەن ادامدار كەلىپ، اۋرۋحانادان الىپ كەتكەن. سودان كەيىن ونى تەرگەۋ يزولياتورىنا اپارىپ، تارتىپسىزدىكتەرگە قاتىسقانى ءۇشىن ايىپتايدى”، – دەلىنگەن حابارلامادا.

قوردىڭ حابارلاۋىنشا، جىگىتتىڭ وتباسى ونىڭ تەرگەۋ يزولياتورىندا وتىرعانىن تەك 19 قاڭتاردا عانا بىلگەن. تۋىستارى شۋ كوتەرىپ، ەرمەكتى تەرگەۋ يزولياتورىنان الىپ شىعادى. كەيىن الماتى تۇرعىنى ءىس بويىنشا جابىرلەنۋشى بولىپ تانىلدى.

ەرمەك ابدىرەشوۆكە قاتىستى QANTAR قورىنىڭ ادۆوكاتتارى كوپتەگەن زاڭ بۇزۋشىلىقتى انىقتاعان. مىسالى، سوقىر ادامنان زاڭدى وكىلسىز جاۋاپ الىنعان. سونداي-اق، وقي المايتىن بىلە تۇرا، جاۋاپ الۋ حاتتاماسىنا قول قويۋعا ماجبۇرلەگەن.

“ايىپتاۋدى الىپ تاستاۋ — ءالى كۇرەستىڭ باسى عانا. الدا ءالى جۇمىس كوپ. ەرمەكتى ازاپتاعان پوليتسەي ءالى كۇنگە بوستاندىقتا. ول ءىس بويىنشا كۋاگەر رەتىندە وتەدى. قۇقىق قورعاۋشىلار ونىڭ قاتىسۋىمەن ازاپتاۋدىڭ 13 ەپيزودىن انىقتادى. پوليتسەيدى زارداپ شەككەندەر مەن كۋاگەرلەر تانىدى”، -دەلىنگەن QANTAR قورى تاراتقان مالىمەتتە.

“ادىرنا” ۇلتتىق پورتالى

پىكىرلەر