Qańtarda bolǵan mıtıngke qatysqan Ermek Ábdireshov kinásiz dep tanyldy. Almaty prokýratýrasy oǵan qatysty qylmystyq qýdalaýdy toqtatty. Bul týraly Qantar qory Instagram paraqshasynda jarııalady, dep habarlaıdy “Adyrna” ulttyq portaly.
Aıta keteıik, 37 jastaǵy Ermek Ábdireshov qańtar oqıǵasynan keıin kózi kórmeı qalǵan. Bir kózi mıtıngtiń qyzyp turǵan shaǵynda kórmeı qaldy. Onyń betine rezeńke oq tıedi. Ekinshisi — tergeý ızolıatoryndaǵy azaptaýdan keıin kórmeı qalǵan.
“5 qańtar kúni Ermek Almaty qalasyndaǵy Respýblıka alańynda ótken beıbit mıtıngke shyqty. Demonstranttardyń aldynda jaryq shýyly bar granatalar jaryldy jáne olarǵa travmatıkalyq tapanshalardan oq jaýdyrdy. Ermek jansaqtaý bólimine tústi. Tórt kúnnen keıin ony forma kıgen adamdar kelip, aýrýhanadan alyp ketken. Sodan keıin ony tergeý ızolıatoryna aparyp, tártipsizdikterge qatysqany úshin aıyptaıdy”, – delingen habarlamada.
Qordyń habarlaýynsha, jigittiń otbasy onyń tergeý ızolıatorynda otyrǵanyn tek 19 qańtarda ǵana bilgen. Týystary shý kóterip, Ermekti tergeý ızolıatorynan alyp shyǵady. Keıin Almaty turǵyny is boıynsha jábirlenýshi bolyp tanyldy.
Ermek Ábdireshovke qatysty QANTAR qorynyń advokattary kóptegen zań buzýshylyqty anyqtaǵan. Mysaly, soqyr adamnan zańdy ókilsiz jaýap alynǵan. Sondaı-aq, oqı almaıtyn bile tura, jaýap alý hattamasyna qol qoıýǵa májbúrlegen.
“Aıyptaýdy alyp tastaý — áli kúrestiń basy ǵana. Alda áli jumys kóp. Ermekti azaptaǵan polıeı áli kúnge bostandyqta. Ol is boıynsha kýáger retinde ótedi. Quqyq qorǵaýshylar onyń qatysýymen azaptaýdyń 13 epızodyn anyqtady. Polıeıdi zardap shekkender men kýágerler tanydy”, -delingen QANTAR qory taratqan málimette.
“Adyrna” ulttyq portaly
