قازاقستاننىڭ بۇرىنعى پرەزيدەنتى نۇرسۇلتان نازارباەۆ 2022 جىلعى قاڭتار وقيعاسى كيەۆتەگى شتاب-پاتەردەن باسقارىلعانىن مالىمدەدى. بۇل تۋرالى ول «مەنىڭ ءومىرىم. بوداندىقتان – بوستاندىققا» اتتى كىتابىندا ايتتى، دەپ حابارلايدى «ادىرنا» ءتىلشىسى.
«راديكالدى وپپوزيتسيانىڭ شىنايى بەت-بەينەسى 2022 جىلعى قاڭتارداعى قايعىلى وقيعا كەزىندە اشىلدى. نارازىلىق اكتسياسىنىڭ باسىنان-اق مۇحتار ءابليازوۆ كوپشىلىكتى ارەكەتكە شاقىرىپ، ۇران تاستادى. ونىڭ ۇندەۋىندە ۋكراينالىق وپەراتورلاردىڭ كودى كورسەتىلگەن. كەيىننەن ءابليازوۆتىڭ الدىن-الا قۇرىلعان شتابى كيەۆتە ورنالاسقانى انىقتالدى. ول ءوزىنىڭ قانتوگىسكە قاتىسى بارىن اشىق ايتتى»،—دەپ جازدى تۇڭعىش پرەزيدەنت.
ەكس-باسشى سول كەزدە قازاقستان ءوز تاريحىنداعى ەڭ اۋىر كەزەڭنىڭ ءبىرىن باستان وتكەرگەنىن اتاپ ءوتتى.
«سول ءبىر سىندى كۇندەردە مەملەكەت باسشىسى قاسىم-جومارت توقاەۆ ەلدەگى جاعدايدى تۇراقتاندىرۋ ءۇشىن ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردەن كومەك سۇرادى. وسىلايشا قازاقستان ەڭ اۋىر سىناقتاردىڭ بىرىنەن سۇرىنبەي ءوتتى»،—دەدى ول.
ەسكە سالايىق، بۇگىن، تۇڭعىش پرەزيدەنت كۇنى نۇرسۇلتان نازارباەۆتىڭ كىتابى جارىققا شىقتى. ول تۋىندىسىندا ءوزىنىڭ ءومىر جولىمەن قاتار، ەلىمىزدىڭ قالىپتاسۋى جانە دامۋ كەزەڭدەرى تۋرالى ەستەلىكتەرىمەن ءبولىستى.
