ەلوردانىڭ سول جاعالاۋىندا ورنالاسقان تۇرعىن ءۇي كەشەندەرى جاقىندا بوي كوتەردى. تۇرعىندارعا پاتەرلەر بەدەلگە، ساپاعا، ىڭعايلىلىققا جانە دامىعان ينفراقۇرىلىمعا سۇيەنە وتىرىپ، جايلىلىق كلاسىنداعى باعامەن ساتىلعان. بىراق قونىس تويىن تويلاعان بويدا، جايلىلىقتى ۇمىتقان كورىنەدى. سەبەبى، اۋادا اعىندى سۋدىڭ تۇنشىقتىراتىن ءيىسى بار. بۇل تۋرالى كتك تەلەارناسى جاريالادى، دەپ حابارلايدى “ادىرنا” ءتىلشىسى.
ءيىستىڭ وتكىر ەكەنى سونشا، ادامدار ءوز پاتەرلەرىن جاۋىپ السا دا، ودان قۇتىلا المايدى. ول جەل مەن جاڭبىر كەزىندە كۇشەيەدى ەكەن.
«ءبىز قوعامدىق دارەتحانادا ءومىر سۇرەتىندەيمىز. كەشىرىڭىز، بىراق سولاي. بۇل تۇراقتى ءيىس. بىرىنشىدەن، بۇل دەنساۋلىققا زيان. اۋادا كۇكىرت كونتسەنتراتسياسىنىڭ جوعارىلاۋى بايقالادى. ءبىز ءتىپتى سەس-كە تەلەفون شالدىق، ولشەۋلەر جۇرگىزدىك، بۇل ولشەمدەر كۇكىرتتىڭ وتە جوعارى دەڭگەيىن كورسەتتى”، - دەدى تۇرعىن ادىلەت ەسبەرگەنوۆ
قاراۋسىز قالعان كارىز تورابى ومىرگە ۇلكەن قاۋىپ توندىرەدى. ادام قالدىقتارىمەن سۋ باسقان ون مەترلىك جەر استى سۋ قويماسى كەز كەلگەن ساتتە قۇلاپ، ورنىندا ۇلكەن شۇڭقىر قالدىرۋى مۇمكىن. ادامداردىڭ قورقاتىنى وسى. ولار اكىمدىككە بىرنەشە رەت ۇجىمدىق حات جازعانىمەن، شەنەۋنىكتەر شارا قولدانۋعا اسىقپايدى.
«جوبالىق-سمەتالىق قۇجاتتامانى ازىرلەۋگە قارجى سۇرالاتىن بولادى. وسىدان كەيىن ونى ازىرلەۋگە كونكۋرس وتكىزىلەدى. مەملەكەتتىك ساراپتامانىڭ قورىتىندىسىن العان بويدا وسى كارىزدىك سورعى ستانتسياسىن كوشىرۋ ءۇشىن قۇرىلىس-مونتاج جۇمىستارىن جۇرگىزەمىز»، - دەدى دەپ حابارلادى استانا قالاسى وتىن-ەنەرگەتيكا كەشەنى جانە كوممۋنالدىق شارۋاشىلىق باسقارماسىنىڭ باسشىسى انۋاربەك يسەناليەۆ.
شەنەۋنىكتەردىڭ سوزىنە سەنسەك، تىعىرىقتان ءىس كوكتەمگە قاراي جىلجۋى كەرەك. قاۋىپتى قۇرىلىستى جويۋ وپەراتسياسى كەلەسى جىلدىڭ سوڭىنا دەيىن اياقتالادى دەپ كۇتىلۋدە.
