"حابار" ارناسىنداعى تەلەدەبات كەزىندە "اۋىل" پارتياسىنىڭ وكىلى جيگۋلي دايراباەۆ دالا دەموكراتياسى، جوعارى مادەنيەت، ادام بويىنداعى رۋحاني كەمەلدىلىك ەرەكشەلىكتەرىن ءسوز ەتتى. ەگەر ەل تىزگىنىن قولعا السا، قۋاتتى اگرارلىق سالاعا نەگىزدەلگەن جاڭا قازاق ەلىنىڭ كوشىن باستاۋعا تالپىناتىنىن جەتكىزدى، دەپ حابارلايدى "ادىرنا" ۇلتتىق پورتالى.
تەلەدەبات بارىسىندا جيگۋلي دايراباەۆ قازاق ەلىن اگرو-وركەنيەت الپاۋىتىنا اينالدىرۋعا ءسوز بەردى. قازىرگى ەڭبەك ءبولىسى مەن قوعامداعى جالاڭ تۇسىنىكتى سىنعا الدى.
- مەملەكەتىمىزدى دامىتۋدى مەن ءۇش باعىتتا كورىپ وتىرمىن. ءبىرىنشىسى - ءبىزدىڭ ۇلتىمىزعا ءتان دالا دەموكراتياسىنىڭ پرينتسيپتەرىن ورناتۋ. نارىققا قارىق بولامىز دەپ وسى قۇندىلىقتاردىڭ بارلىعىن جوعالتتىق. التىن بەسىگىمىزدى، اۋىلدان شىققان ادامدى مەنسىنبەيتىن حالگە جەتتىك. قارايىم ەڭبەك ادامىن قاستەرلەۋدى قويدىق... مەن بيلىك تە بايلىق تا حالىققا تيەسىلى بولۋىن ءسوز ەمەس، ءىس جۇزىندە جۇزەگە اسىرامىن، - دەدى كانديدات.
سونداي-اق ول اۋىل تىرلىگىن جانداندىرىپ، شارۋاشىلىقتى قارىشتاتىپ دامىتۋعا ەكپىن قويدى. ەلىمىزدى ساپالى جانە باعاسى قولجەتىمدى وتاندىق ونىممەن تولتىرىلاتىن اگرارلىق دەرجاۆاعا اينالدىرۋعا نىق بەكىنگەنىن جەتكىزدى.
"انالاردىڭ كوڭىلى دالادا ەمەس، بالادا بولۋى كەرەك. انا ءتىلىنىڭ مارتەبەسىن ارتتىرۋ قاجەت، مەملەكەتتىك ءتىلدى بارلىق سالاعا تەرەڭ ەنگىزۋىمىز ءتيىس، جاستاردى ەڭبەككە باۋلىپ، ۇلتتىق قۇندىلىقتار مەن اعا بۋىنعا قۇرمەتتى ارتتىرامىز. ەگەر ماعان مۇمكىندىك بەرىلسە، وسىنىڭ بارلىعىن ءسوز جۇزىندە ەمەس، ءىس جۇزىندە دالەلدەۋگە دايىنمىن. قازاقستان ەڭبەككەرلەرى جاساسىن", - دەدى دايراباەۆ جارىسسوزدە.
ول جەمقورلىقپەن كۇرەستى ادامي-رۋحاني تاربيەدەن باستاۋ قاجەتتىگىن دە اتاپ ءوتتى.
ەستەرىڭىزگە سالا كەتەيىك، قازاقستان پرەزيدەنتىنىڭ مەرزىمىنەن تىس سايلاۋى 20 قاراشاعا بەلگىلەنگەن.
"ادىرنا" ۇلتتىق پورتالى
